ភ្នំពេញៈ បុគ្គលល្បីឈ្មោះលើបណ្តាញទំនាក់ទំនងសង្គមហ្វេសប៊ុក គឺ កញ្ញា ធី សុវណ្ណថា និងលោក K01 បានជួបគ្នាក្នុងកម្មវិធី Money Hunter របស់ទូរទស្សន៍ Nice TV កាលពីចុងសប្តាហ៍នេះ។ ក្រៅពីចូលរួមប្រកួតឆ្លើយសំណួរជាច្រើន អ្នកទាំងពីរក៏បានបាញ់បោះពាក្យសម្តីជាច្រើន ទៅកាន់គ្នាទៅវិញទៅមកផងដែរ ។
នេះគឺជាលើកដំបូងដែល កញ្ញា ធី សុវណ្ណថា និងលោក ឃឿន សុឡា ហៅK01 បានជួបមុខគ្នាដោយផ្ទាល់។ ជំនួបគ្នារយៈពេលជិតមួយម៉ោង ពួកគេបានចូលរួមឆ្លើយសំណួរពីកម្មវិធី ចំនួន១២សំណួរ ជាមួយទស្សនិកជននៅតាមគេហដ្ឋានតាមរយៈកម្មវិធី Tutu Live។ ដោយសារកម្មវិធីមានអ្នកចូលរួមលេង និងទស្សនារាប់ម៉ឺននាក់ ទើបចំនួនអ្នកឆ្លើយដល់សំណួរចុងក្រោយ មានចំនួនច្រើន ទើបទឹកប្រាកដែលទទួលបានពីកម្មវិធីទាំង៤លានរៀល ត្រូវចែកជាមួយអ្នកលេងនៅតាមគេហដ្ឋានដែលម្នាក់ៗ បានត្រឹមតែជាង៣ពាន់រៀលប៉ុណ្ណោះ ។
កញ្ញា ធី សុវណ្ណថា បានលើកឡើងថា ជាកម្មវិធីថ្មី ដែលទទួលបានការចាប់អារម្មណ៍ខ្លាំងពីទស្សនិកជន ពិសេសមិត្តយុវវ័យ ហើយនាងពេញចិត្តនឹងកម្មវិធីនេះ ដែលបានផ្តល់ចំណេះដឹងទូទៅដល់យុវជនខ្មែរ។ នាងលើកឡើងថា ទោះប្រាក់រង្វាន់ដែលទទួលបានជារៀងរាល់ថ្ងៃ ដែលអ្នកឈ្នះដល់សំណួរចុងក្រោយ ទទួលបានទឹកប្រាក់តិច ប៉ុន្តែពួកគេអាចសន្សំ និងចំណាយពេលស្វែងយល់ពីចំណេះដឹងទូទៅជាជាងការចំណាយពេលធ្វើសកម្មភាពមិនល្អនានា ដែលនាំឲ្យប៉ះពាល់ដល់ខ្លួនឯងគ្រួសារ និងសង្គម។ នាងថា ជំនួបជាមួយលោក K01 គឺកាន់តែរិតចំណងមិត្តភាពនាង និងអ្នកសារព័ត៌មាន យុវវ័យជាច្រើនបន្ថែមទៀត ប៉ុន្តែអ្វីដែលនាងអស់សំណើច គឺលោក K01សន្យាថា នឹងប៉ាវនាងទទួលទានស៊ុបក្រោយលេងកម្មវិធីឈ្នះ ប៉ុន្តែទឹកប្រាក់ដែលទទួលបានមិនគ្រប់គ្រាន់ ក្នុងការទទួលទានស៊ុបនោះទេ ។
លោក ឃឿន សុឡា ហៅ K01 វិញបានលើកឡើងថា ជំនួបគ្នាជាមួយកញ្ញា ធី សុវណ្ណថា គឺមិនមែនស្ថិតក្នុងន័យឈ្លោះគ្នាដៀមដាមនោះទេ គឺកាន់តែបង្ហាញពីការរួមសាមគ្គីគ្នា។ ទោះជាយ៉ាងណា អ្វីដែលលោកអស់សំណើច គឺកញ្ញា ធី សុវណ្ណថា ខំជិះរថយន្តទំនើប ពាក់ម្កុដដែលនាងទទួលបានពីកម្មវិធីប្រឡងនៅប្រទេសកូរ៉េមកថែមទៀត តែអាចឈ្នះទឹកប្រាក់បានត្រឹមតែជាង៣ពាន់រៀលប៉ុណ្ណោះ។ លោកថា ទោះបីបានប្រាក់រង្វាន់តិចតួចពីកម្មវិធី ប៉ុន្តែលោកសប្បាយចិត្ត ព្រោះតែសង្កេតឃើញថា យុវជនជាច្រើនបានចូលរួម និងមានចំណេះដឹងច្រើន ក្នុងការឆ្លើយសំណួរ។ លោករំពឹងដែរថា ក្រោយជំនួបផ្ទាល់ក្នុងកម្មវិធីទូរទស្សន៍លើកដំបូង ជាមួយកញ្ញា ធី សុវណ្ណថា នេះ នឹងមានជំនួបជាថ្មី ក្នុងកម្មវិធីផ្សេងៗទៀតផងដែរ៕
វីដេអូ
