កំពតៈ រថយន្តឡិចស៊ីស RX-450 ពណ៌ស សេរីទំនើបមួយគ្រឿង បើកបរលើផ្លូវសុខៗ ស្រាប់តែរេចង្កូត ជ្រុលធ្លាក់ចូលក្នុងទឹកភក់ប្រឡាយ បង្កការភ្ញាក់ផ្អើលដល់អ្នកដំណើរទាំងកណ្ដាលថ្ងៃ។
គ្រោះថ្នាក់ចរាចរណ៍ខាងលើនេះ កើតឡើងកាលពីវេលាម៉ោង១និង២០នាទីរសៀល ថ្ងៃទី៨ ខែឧសភា ឆ្នាំ២០១៨ លើកំណាត់ផ្លូវជាតិលេខ៣៣ (កែប-កំពត) ត្រង់ចំណុចភូមិកំពង់កែស ឃុំត្រពាំងសង្កែ ស្រុកទឹកឈូ ខេត្តកំពត។
តាមប្រភពព័ត៌មាននៅកន្លែងកើតហេតុ បាននិយាយថា មុនពេលកើត គេឃើញរថយន្តឡិចស៊ីស RX-450 ពណ៌ស ពាក់ស្លាកលេខ ភ្នំពេញ 2AA-8767 បើកបរដោយស្ត្រីម្នាក់មិនស្គាល់អត្តសញ្ញាណ បើកបោះពួយយ៉ាងលឿន ពីកើតទៅលិច លុះមកដល់ចំណុចកើតហេតុ ស្រាប់តែរថយន្តនេះរេចង្កូតសំដៅទៅខាងស្តាំដៃ ហើយក៏ធ្លាក់ចុះទឹកប្រឡាយទាំងកំរោលតែម្តង។
ប្រភពខាងលើ បានឲ្យដឹងទៀតថា បន្ទាប់ពីកើតហេតុ គេឃើញស្ត្រីជាអ្នកបើកបរចេញពីរថយន្ត ដោយពុំមានរងរបួសអី្វទេ រួចគេចខ្លួនបាត់ភ្លាមៗ ដោយទុកឱ្យរថយន្តផឹកទឹកលេងក្នុងប្រឡាយមួយចម្អែត។
ក្រោយកើតហេតុក៏មានក្រុមអ្នកសារព័ត៌មានចុះមកថតផ្តិតយករូបភាព ប៉ុន្តែត្រូវបានរេរាំងពីសំណាក់បុរសម្នាក់ ដែលគេអះអាងថា ជាសាច់ញាតិរបស់ម្ចាស់រថយន្ត តែពុំមានប៉ះទង្គិតពាក្យសំដីធ្ងន់ធ្ងរនោះទេ។
បច្ចុប្បន្នបងប្អូនម្ចាស់រថយន្តបានហៅរថយន្តមកស្ទូចចេញពីទឹកប្រឡាយ ដើម្បីយករថយន្តទំនើបនេះទៅជួសជុលវិញហើយ៕
