
កណ្ដាលៈ ជនសង្ស័យ២នាក់ រួមនឹងថ្នាំញៀន និងកាំភ្លើងខ្លីមួយដើម ត្រូវបានកម្លាំងនគរបាលស្រុកអង្គស្នួល ធ្វើការបង្ក្រា និងឃាត់ខ្លួន បានកាលពីវេលាម៉ោង១០និង១៥នាទីយប់ថ្ងៃទី១១ខែឧសភា ឆ្នាំ២០១៨ ចំណុចលើផ្លូវជាតិលេខ៤ ស្ថិតក្នុងភូមិត្រពាំងរាំង ឃុំព្រៃពួច ស្រុកអង្គស្នួល ខេត្តកណ្តាល។
អធិការស្រុកអង្គស្នួល លោកវរសេនីយ៍ឯក មាន សំណាង បានឲ្យដឹងថា ជនសង្ស័យ ទី១ ឈ្មោះហួត មឿន ហៅប៉ាវ ហៅម៉ន ភេទប្រុស អាយុ៣៤ឆ្នាំ ជនជាតិខ្មែរ មុខរបរលក់ម៉ូតូ មានទីលំនៅបច្ចុប្បន្ន នៅភូមិចំរើនផល ឃុំពោធិ៍ម្រាម ស្រុកបរសេដ្ឋ ខេត្តកំពង់ស្ពឺ។ ២-ឈ្មោះ ធឿស សំអាង ភេទប្រុស អាយុ២៨ឆ្នាំ ជនជសតិខ្មែរ មុខរបរជាងឡានមានទីលំនៅភូមិអង្គមេត្រី ឃុំស្រលាំងគ្រើល ខេត្តកំពង់ស្ពឺ។

លោកអធិការ បានបន្តថា មុនពេលកើតហេតុ កម្លាំងជំនាញគ្រឿងញៀន សហការជាមួយកម្លាំងសណ្តាប់ធ្នាប់ចរាចរណ៍ បានស្ទាក់ត្រួតពិនិត្យរថយន្តឡិចស៊ីស RX៣០០មួយគ្រឿងពណ៌ស គ្មានស្លាកលេខ ខណៈកំពុងបើកបរពីលិចទៅកើត ដោយក្នុងរថយន្តមានមនុស្សប្រុស២នាក់ ពេលឆែកឆេរ ស្រាប់តែរកឃើញថ្នាំញៀន១កញ្ចប់ (ទម្ងន់១ជី) អាវុធខ្លីធន់ K.៥៩ មួយដើម បង់១ គ្រាប់៤គ្រាប់ ស្រោមអាវុធខ្លី៤ និងថង់វេចខ្ចប់ ថ្នាំញៀនដែកកេះជាច្រើននៅក្នុងកាបូបស្ពាយឈ្មោះ ហួន មឿនហៅប៉ាវ។ ក្រោយពីត្រួតពិនិត្យឃើញវត្ថុតាងទាំងនេះហើយ ជនសង្ស័យឈ្មោះ ហួន មឿន បាន សារភាពថា ថ្នាំញៀននេះ ខ្លួនបានទិញពីជនមិនស្គាល់ឈ្មោះនៅភ្នំពេញ ទិញម្តងៗចំនួនពី៤០០$ទៅ៥០០$ ដើម្បីយកទៅលក់បន្ត។ ចំណែកអាវុធខ្លី ឈ្មោះ ថន ភេទប្រុស នៅតាខ្មៅជាអ្នកឲ្យមកប្រើ។

បច្ចុប្បន្នជនសង្ស័យ រួមនឹងវត្ថុតាង ត្រូវបានបញ្ជូនមកអធិការដ្ឋាននគរបាលស្រុកអង្គស្នួល ដើម្បីសាកសួរបន្ត និងកសាងសំណុំរឿងចាត់ការតាមនីតិវិធីច្បាប់៕

