ភ្នំពេញៈ គ្មានអ្នកណានឹកស្មានសោះថា រឿង "បាតដៃខ្មៅ" ដែលផលិតដោយក្រុមហ៊ុន Sabay ជាលើកទី១នោះ មានការទាក់ទាញ ខណៈពេលមិនទាន់ឃើញសាច់រឿង ម្នាក់ៗ ច្បាស់ជាគិតថា មិនអាចទៅរួច។ នៅទីបំផុតរឿងនេះ បានឆក់ចិត្តមិត្តអ្នកទស្សនាឲ្យស្យង់លង់មើលទាល់តែចប់ ហើយលាន់មាត់ថា ពិតជាពិសេស សាច់រឿងប្រទាក់ក្រឡា តាំងពីដើមទីដល់ចប់។
កាលពីល្ងាចថ្ងៃទី២៦ ខែមិថុនា ឆ្នាំ២០១៨នេះ ក្រុមហ៊ុនសប្បាយ បានរៀបចំពិធីសម្ពោធរឿង "បាតដៃខ្មៅ" ជារឿងបង្ហាញពីអបិយជំនឿបុរាណខ្មែរ ដែលយុវវ័យសម័យនេះ ត្រូវតបសំដៅតមមាត់កជាច្រើនពេលចេញទៅតាមខេត្តតាមស្រុកភូមិឆ្ងាយៗ។ នាល្ងាចម្សិលមិញនេះ ឃើញមានវត្តមានលោក ខៀវ កាញារីទ្ធ លោក ហ៊ុន ម៉ានី តារាសម្តែងក្នុងសាច់រឿង ព្រមទាំងថ្នាក់ដឹកនាំផលិតកម្ម និងក្រុមហ៊ុនសប្បាយ។
លោក ជី សិលា នាយកប្រតិបត្តិក្រុមហ៊ុនសប្បាយ ឲ្យដឹងថា លោកអ្នកមិនទាន់បានទស្សនារឿង "បាតដៃខ្មៅ" អាចនឹងគិតថា រឿងនេះ ចូលដល់អារម្មណ៍អ្នកទស្សនាបានអត់។ ប៉ុន្តែលោកអ្នកនឹងភ្ញាក់ផ្អើលចំពោះសាច់រឿងមួយនេះ ក៏ដូចជាទេពកោសល្យតួសម្តែង ដែលគ្រាន់តែជាអ្នកចម្រៀងបែបស្នាដៃកូនខ្មែរ បែរជាមកក្លាយជាថតភាពយន្ត រួចសម្តែងបានកម្រិតមួយនឹកស្មានមិនដល់។ លោកថា ចង់ផ្តល់ឱកាសឲ្យអ្នកនិពន្ធវ័យក្មេងផលិតករវ័យក្មេង និងតារារលកក្រោយ មានឱកាសបញ្ចេញនូវអ្វីដែលខ្លួនស្រឡាញ់ ហើយខិតខំធ្វើឲ្យបាន។ យើងក៏ត្រូវការអ្នកដឹកនាំជើងចាស់ព្រឹទ្ធាចារ្យនានា ដើម្បីប្រឹក្សាជូនអ្នកក្រោយ។
"បាតដៃខ្មៅ" បោះទុនល្មមទេ តែបានដាក់ទិសដៅបង្ខំតារាថ្មីភាគច្រើន ជាអ្នកចម្រៀង អ្នកនិពន្ឋរហូតទាល់តែអាចសម្រេចបាន។ រឿងនេះ បង្ហាញពីអបិយជំនឿប្លែកៗរបស់ប្រជាជននៅតំបន់ភូមិភាគឦសាន ដូចជាប្រពៃណីរំដោះគ្រោះ ហៅវិញ្ញាណកាប់ក្របីសែនជាដើម។ ស្នាដៃដំបូងនេះ នឹងចាក់បញ្ចាំងគ្រប់រោងកុន ចាប់ពីថ្ងៃទី២៨ ខែមិថុនា ឆ្នាំ២០១៨តទៅ។
លើសពីនេះទៅទៀត រឿងនេះក៏បានបង្កប់នូវជំនឿនានា ដូចជាតំណមសម្តី ដែលអ្នកដំណើរទូទៅគួរជៀសវៀងចំពោះអ្នកជិតស្លាប់ ឬវិញ្ញាណអាក្រក់នានា ដែលសុទ្ធតែមានឥទ្ធិពលកាចសាហាវ តាមព្យាបាទឲ្យជួបឧប្បតិ្តហេតុនានា ដែលនឹកស្មានមិនដល់។
បាតដៃខ្មៅ គឺជាខ្សែភាពយន្តបែបរន្ធត់ និងមនោសញ្ចេតនា ដែលនិយាយអំពីតារាចម្រៀងប្រុសមួយក្រុម មានឈ្មោះថា បាតដៃខ្មៅ។ ដោយសារតែអបិយជំនឿ និងការប្រមាថ បានធ្វើឲ្យពួកគេជាប់បណ្ដាសារ។ តើពួកគាត់នឹងស្វែងរកវិធីដោះស្រាយដោយរបៀបណា?