ថ្មីៗនេះ នៅខេត្តព្រះសីហនុមានចោរកម្មកើតឡើងញឹកញ៉ប់ ជាពិសេសកាលពីម្សិលមិញក្រុមចោរជនជាតិចិនមួយក្រុមដែលជិះសុទ្ធតែរថយន្តទំនើប Rolls Royce ប្រដាប់ដោយអាវុធបានប្លន់ជនជាតិខ្មែរ។ ភ្លាមៗ ក្រោយពីហេតុការនេះ ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ បានផ្ញើសារជូនប្រជាពលរដ្ឋដែលរស់នៅខេត្តព្រះសីហនុថា៖
សូមបងប្អូនជឿជាក់លើកម្លាំងសមត្ថកិច្ចយើង ដូចខ្ញុំធ្លាប់បាននិយាយហើយ ពួកយើងមានកម្លាំងប៉ូលិស អាវុធហត្ថ ទាហាន តុលាការ យើងអនុវត្តច្បាប់បង្ក្រាបមិនឱ្យមានជើងកាងមកបង្ករអនាធិបតេយ្យនៅខេត្តយើងបានទេ តែជៀសមិនផុតទេតែមនុស្សច្រើន លុយច្រើន រឿងច្រើន សំរាមច្រើន។ល។ តែយើងមិនអាចព្រោះតែបញ្ហាខ្លះនេះឃាត់ឬមិនស្វាគមន៍ភ្ញៀវមកស្រុកយើងបានទេ ព្រោះតែស្រុកយើងមានសន្តិភាព មានច្បាប់ល្អ គេជឿទើបគេមកវិនិយោគ មកលេងស្រុកយើង។
ដូច្នេះមានតែយើងពង្រឹងការអនុវត្តច្បាប់ឱ្យម៉ឺងម៉ាត់ដើម្បីគ្រប់គ្រងសន្តិសុខ សណ្តាប់ធ្នាប់សង្គមយើង ហើយយើងទាញយកប្រយោជន៍គ្រប់គ្នាតាមជំនាញ សមត្ថភាព នេះជាឱកាសរបស់បងប្អូនហើយ។
ឯកឧត្តម យន្ត មីន បានអះអាងកន្លងមកពួកបង្កបញ្ហានៅខេត្តយើងមិនដែលរួចខ្លួនទេ ត្រូវកម្លាំងយើង(ប៉ូលិស អាវុធហត្ថ) បង្រ្កាបបានទាំងអស់។
អភិបាលខេត្តព្រះសីហនុ រូបនេះបានសំណូមពរថា៖ សូមបងប្អូនជឿជាក់ក្នុងនាមគណបញ្ជាការឯកភាពខេត្ត ខ្ញុំជឿជាក់លើកម្លាំងសមត្ថកិច្ចយើង ហើយការពាដាច់ខាតមិនឱ្យមានអ្នណាមកបង្កអនាធិបតេយ្យក្នុងខេត្តព្រះសីហនុបានទេ បើមានក៍មិនរួចខ្លួនដែរសង្កេតមើលចុះ គឺបង្រ្កាបបាន។