ចិនសន្យាផ្តល់ជំនួយគិតជាទឹកប្រាក់ជាង១០០លាន ដុល្លារដើម្បីបម្រើក្នុងវិស័យការពារជាតិ ជំនួយថវិការបស់ចិននឹងបន្តហូរចូលវិស័យយោធាកម្ពុជា បន្ថែមលើសម្ភារយោធាច្រើនសន្ធឹកសន្ធាប់ដែលចិនធ្លាប់ផ្តល់ដល់កម្ពុជា។ នេះបើយោងតាមនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ។
នាយឧត្តមសេនីយ៍ ឈុំ សុជាតិ បានថ្លែងថា ចិនសន្យានឹងផ្តល់លុយចំនួន៦៤៥លានយ័នដល់កម្ពុជា ដើម្បីបម្រើក្នុងវិស័យការពារជាតិ។ ការសន្យាផ្តល់ជំនួយថវិកាដល់វិស័យនេះ កើតមានឡើងបន្ទាប់ពីចិន និងកម្ពុជាបានធ្វើសមយុទ្ធយោធាដែលមានឈ្មោះថា នាគមាស ចំនួន២ដង ពោលគឺគិតពីឆ្នាំ២០១៦ មកដល់ឆ្នាំ២០១៨ នេះ ហើយសមយុទ្ធនេះនឹងបន្តធ្វើទៀតនៅឆ្នាំ២០១៩ ខាងមុខទៀត។
យោងតាមការចុះផ្សាយក្នុងគេហទំព័រហ្វេសប៊ុកនាយឧត្តមសេនីយ៍ ឈុំ សុជាតិ បានឱ្យដឹងថា៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ នៃព្រះរាជាណាចក្រកម្ពុជា បានជួបជាមួយ ឯកឧត្តម នាយឧត្តមសេនីយ៍ វៃ ហ្វេហេ (WEI FENGHE) សមាជិកក្រុមប្រឹក្សារដ្ឋ និងជារដ្ឋមន្រ្តីក្រសួងការពារជាតិ នៃសាធារណរដ្ឋប្រជាមានិតចិន កាលពីថ្ងៃទី១៧ ខែមិថុនា ឆ្នាំ២០១៨។ ភាគីទាំងពីរប្តេជ្ញាបន្តរឹតចំណងមិត្តភាពទៅវិញទៅមក ឱ្យកាន់តែខ្លាំងក្លាថែមទៀត ជាពិសេសគឺ មិត្តចិនបានផ្តល់ជំនួយឥតសំណងបន្ថែម ៦៤៥លានយ័ន ដល់កម្ពុជាយើង សម្រាប់ប្រើប្រាស់ក្នុងវិស័យយោធា ទៅតាមតម្រូវការចាំបាច់។
ឯកឧត្តម ឈុំ សុជាតិបានសង្កត់ធ្ងន់ថា៖ ការផ្តល់ជំនួយនេះ ដើម្បីអបអរសាទរដល់ខួបលើកទី៦០ នៃទំនាក់ទំនងការទូតកម្ពុជា-ចិន ហើយភាគីទាំងពីរនឹងរៀបចំពិព័រណ៍យោធាកម្ពុជា-ចិន រយៈពេល៥ថ្ងៃ ចាប់ពីថ្ងៃទី១៩-២៤ ខែមិថុនា ឆ្នាំ២០១៨ នៅមជ្ឈមណ្ឌលពិព័រណ៍ និងសន្និបាតកោះពេជ្រ ដើម្បីបង្ហាញអំពីសមិទ្ធផលនានា នៃកិច្ចសហប្រតិបត្តិការយោធា របស់ប្រទេសទាំងពីរផងដែរ។
សូមបញ្ជាក់ថា កម្ពុជា-ចិន បានធ្វើសមយុទ្ធយោធានាគមាស រយៈពេល១៣ថ្ងៃ កាលពីថ្ងៃទី១៧-២៩ ខែមីនា ឆ្នាំ២០១៨ នៅតំបន់ភ្នំធំម្រះព្រៅ ក្នុងភូមិថ្លុកដូនស ឃុំក្រាំងអំពិល ស្រុកសំរោងទង ខេត្តកំពង់ស្ពឺ។
