មន្ត្រីជាន់ខ្ពស់ ផ្នែកកិច្ចការសាធារណៈនៃស្ថានទូតអាមេរិកប្រចាំនៅកម្ពុជា បានអះអាងថាការចែកចាយរូបអាក្រាត ឬការកេងប្រវ័ញ្ចផ្លូវភេទរបស់ក្មេងមិនទាន់គ្រប់អាយុ ជាករណីធ្ងន់ធ្ងរមិនអាចអត់ឱនឱ្យបាននោះឡើយ។ ប៉ុន្តែ មន្ត្រីជាន់ខ្ពស់រូបនេះបញ្ជាក់ថា៖ សហរដ្ឋអាមេរិកគោរពសិទ្ធិក្នុងការធ្វើបាតុកម្មដោយសន្តិវិធីរបស់ជនគ្រប់រូប រួមទាំងការតវ៉ារបស់អតីតក្រុមសន្តិសុខស្ថានទូតទាំងនេះផងដែរ។
ការបញ្ជាក់របស់មន្ត្រីជាន់ខ្ពស់រូបនេះ ធ្វើឡើងក្រោយពីអតីតក្រុមសន្តិសុខ របស់ស្ថានទូតសហរដ្ឋអាមេរិកជាង២០នាក់ ដែលត្រូវបានបណ្ដេញចេញពីការងារកាលពីខែមេសា ដោយសារករណីចែកចាយរូបភាពអាសអាភាស បានធ្វើបាតុកម្មទាមទារស្ថានទូតអាមេរិកផ្ដល់យុត្តិធម៌ដល់ពួកគេ កាលពីថ្ងៃម្សិលមិញ។
ការតវ៉ារបស់អតីតបុគ្គលិករបស់ស្ថានទូតអាមេរិកបានដាក់ញត្តិជូនស្ថានទូតអាមេរិករួចរាល់ហើយ ដោយទាមទារ៧ចំណុច៖ ទី១- ទាមទាររកយុត្តិធម៌ពីការបញ្ឈប់ពួកគាត់ដោយបង្ខំនិងមិនបង្ហាញភស្តុតាង ទី២- ទាមទារកែពាក្យពីការបណ្តេញចេញមកជាការកាត់បន្ថយបុគ្គលិកវិញ ទី៣- ទាមទារសំណង០៦ខែទៅតាមច្បាប់កាត់បន្ថយបុគ្គលិក ទី៤- សូមប្តឹងពីបទរំលោភសិទ្ធិបុគ្គលិក ដោយដកហូតយកទូរសព្ទ័ទៅឆែកមើលគ្រប់រូបភាព និងឯកសារផ្សេងៗ ព្រមទាំងរឹបអូសយកទូរសព្ទ័ពួកគាត់មួយចំនួនទៅរក្សាទុកមួយរយៈពេល ទី៥- សូមឱ្យទូទាត់លុយមូលនិធិឧបត្ថម្ភ (ប្រាក់១២%) ក្នុងខែនេះ ព្រមទាំង០៣ខែកន្លងមកដែលមិនទាន់ទូទាត់ឲ្យពួកគាត់ ទី៦-ទាមទារសំណងជំងឺចិត្តទៅលើការបង្ខូចកេរ្តិ៍ឈ្មោះ និងកិតិ្តយសដោយចោតប្រកាន់គ្មានភស្តុតាង និងទី៧- សូមឱ្យសហគមបុគ្គលិកខ្មែរមានសិទ្ធិចូលរួមដោះស្រាយពីបញ្ហាការបញ្ឈប់បុគ្គលិកខ្មែរ ដែលមានភាពយុត្តិធម៌ និងត្រឹមត្រូវតាមច្បាប់ការងារ។
លោក ឡុង សេងគឹមហុង អតីតសន្តិសុខម្នាក់ក្នុងចំណោម៣២នាក់ បានប្រាប់ថាគាត់ធ្វើការនៅស្ថានទូតអាមេរិកជិត២០ឆ្នាំ ហើយ ហើយគាត់ជឿថាអាមេរិកជាប្រទេសប្រជាធិបតេយ្យ និងជឿថាឯកឧត្តមឯកអគ្គរដ្ឋទូត នឹងរកយុត្តិធម៌ឲ្យពួក។