លោក ព្រាប កុល ប្រធានអង្គការតម្លាភាពកម្ពុជា (TIC) បានពន្យល់អំពីការអះអាងរបស់មន្ត្រីជាន់ខ្ពស់ នៃក្រសួងការងារថា កម្ពុជាមានអាត្រាអ្នកមានការងារធ្វើរហូតដល់ ៩៩.៣% យ៉ាងដូច្នេះថា៖ ខ្ញុំរកឃើញចម្លើយទាក់ទងទៅនឹងអត្រាមានការងារធ្វើ ៩៩.០៣% ហើយ អ្វីដែលឆ្ងល់ យើងត្រូវតែរកចម្លើយឲ្យឃើញ ហើយខ្មែរត្រូវតែដឹង។
លោក ព្រាប កុល ពន្យល់បន្ថែម៖ យោងតាមប្រធានសេដ្ឋវិទូរប្រចាំការិយាល័យអង្គការ ការងារអន្តរជាតិ (ILO) ប្រចាំតំបន់អាស៊ីប៉ាស៊ីហ្វិក ឈ្មោះ Sara Elder បានឲ្យដឹងថាពលរដ្ឋខ្មែរជាច្រើននាក់ ធ្វើការងារ ៣ ទៅ ៤ ម៉ោង (few hours) ក្នុង១សប្តាហ៍ ដូចជាការលក់ដូរនៅតាមចិញ្ចើមផ្លូវ ហើយគាត់ត្រូវរកការងារផ្សេងៗទៀតដើម្បីរកចំណូលបន្ថែម ដូច្នេះអាចនិយាយបានថា ពួកគេមានការងារធ្វើផង និងអត់ការងារធ្វើផងក្នុងពេលតែមួយ។
ដោយឡែក យោងតាមរបាយការណ៍អង្គការ ILO ៥១% នៃការងារនៅកម្ពុជាជាប្រភេទការងារមិនទៀងទាត់ ឬការងារដែលងាយបាត់បង់ទៅវិញ (vulnerable) ដែលគ្មានប្រាក់ខែពិតប្រាកដ ពោលគឺធ្វើការងារជាកសិករ ឬធ្វើការឲ្យក្រុមគ្រួសារខ្លួនឯង ។ល។ ដែលជាប្រភេទការងារនេះ ត្រូវបានសេដ្ឋវិទូរមួយចំនួនចាត់ទុកថាជាភាពគ្មានការងារធ្វើ (unemployed)។
លោកប្រធានអង្គការរូបនេះបានដកស្រង់សម្តីមន្ត្រីនៃអង្គការតស៊ូមតិ Solidarity Center ឈ្មោះ William Conklin ធ្លាប់បាននិយាយថា៖ ពលរដ្ឋខ្មែរជាច្រើនមានការងារលើសពី១ ដោយសារតែប្រាក់ខែតិច ដូច្នេះវាជារឿងធម្មតា ដែលយើងឃើញនារីខ្មែរខ្លះធ្វើការជាអ្នកលក់ដូរនៅពេលថ្ងៃ ហើយធ្វើការនៅក្លឹបកម្សាន្ត ឬខារ៉ាអូខេនៅពេលយប់។
លោក ព្រាប កុល មានមោទនភាពក្នុងនាមជាកូនខ្មែរ តែងតែត្រេកអរចំពោះការអភិវឌ្ឍលើគ្រប់វិស័យ ក៏ដូចជាសមិទ្ធិផលនានាដែលត្រូវបានកសាងឡើងដោយរាជរដ្ឋាភិបាល។ ការរីកចម្រើនទាំងឡាយ ចំនុចវិជ្ជមាននៅក្នុង វិស័យសំខាន់ៗគឺជាមោទនភាពរបស់ខ្មែរយើង។ ជាមួយគ្នានេះដែរ លោកក៏សូមរិះគន់ដើម្បីស្ថាបនាខ្លះ ក៏ព្រោះតែចង់បានការឈរលើគោលការណ៍ប្រាកដនិយម ឬជាក់ស្តែងនិយម។ យើងគួរព្យាយាមលុបចោលបន្តិចម្តងៗនូវលក្ខណ: ជាស្គរ (ទូងៗប្រហោងក្នុង) ឬល្អមើល តែមិនល្អស៊ី
ការពន្យល់របស់លោក ព្រាប កុល បែបនេះធ្វើឡើងក្រោយពី ឯកឧត្តម អ៊ិត សំហេង រដ្ឋមន្ត្រី ក្រសួងការងារ និង បណ្តុះបណ្តាលវិជ្ជាជីវៈ កាលពីថ្ងៃទី០៨ ខែមិថុនា ឆ្នាំ២០១៨ កន្លង បានអះអាងថាប្រទេសកម្ពុជានាពេលបច្ចុប្បន្ននេះ អត្រាអ្នកមានការងារធ្វើខ្ពស់រហូតដល់កម្រិត៩៩.៣% ស្មើនឹងប្រមាណជិត១០លាននាក់ ហើយអត្រាគ្មានការងារធ្វើ ត្រូវបានកាត់បន្ថយមកត្រឹមកម្រិតទាប០.៧%។
