Thursday, June 21, 2018

មានចឹងទៀត? ជិះម៉ូតូធំឌុបសង្សារ ជ្រុលបុកគូថរថយន្ត គេទារ១០០ដុល្លារ ដោះស្រាយមិនចេញ បើកម៉ូតូរត់ចោលនាងបាត់

អាម៉ាប៉ាប៉ាញ៉ូស

ភ្នំពេញៈ គូស្នេហ៍ស្រស់សោភាមួយគូ ជិះម៉ូតូមួយគឿង ក្នុងល្បឿនយ៉ាងលឿនជ្រុលទៅបុកគូទរថយន្តមួយគ្រឿងទៀត បណ្តាលឲ្យរងការខូចខាតបន្តិចបន្តួចប៉ុណ្ណោះ តែដោយសារដោះស្រាយមិនត្រូវគ្នា ភាគីខាងបុរសបានឡើងជិះម៉ូតូរត់គេចខ្លួនបាត់ បន្សល់ទុកនារីជាសង្សារឲ្យសងគេជំនួស។ ហេតុការណ៍នេះ កើតឡើងកាលពីវេលាម៉ោង១០៖១០នាទីយប់ ថ្ងៃទី២០ ខែមិថុនា ឆ្នាំ២០១៨ ត្រង់ចំណុចស្តុបផ្សារដីហុយ តាមបណ្តោយផ្លូវ១៩៨៦ កែងផ្លូវហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

សាក្សីឃើញហេតុការណ៍ រៀបរាប់ប្រាប់ភ្នាក់ងារ CAM​ POST​ ថា នៅមុនពេលកើតហេតុ គេឃើញបុរសម្នាក់ បើករថយន្តមួយគ្រឿងម៉ាក Highlander ពណ៌ស្ករ ពាក់ស្លាកលេខ ភ្នំពេញ 2V-6084 ធ្វើដំណើរតាមបណ្តោយផ្លូវ១៩៨៦ ក្នុងទិសដៅពីកើតទៅលិច។ លុះមកដល់ចំណុចកើតហេតុ រថយន្តខាងលើបម្រុងបត់ឆ្វេងទៅផ្លូវហាណូយ ពេលនោះស្រាប់តែមានម៉ូតូមួយ​គ្រឿង​ទៀត​ម៉ាក Ducati​ ពណ៌ក្រហម គ្មានស្លាកលេខ ​បើកបរ​ដោយបុរសម្នាក់ ឌុបនារីម្នាក់ទៀត ​ដែលជាសង្សារ​នឹងគ្នា បានជិះមកពីក្រោយ​ក្នុងល្បឿនយ៉ាងលឿន​ រួច​ក៏​ជ្រុល​ទៅ​បុក​គូទ​រថយន្តចំ​ពី​ក្រោយ​ចំហៀង​ខាង​ឆ្វេង​ពេញ​ទំហឹង​ បណ្តាលឲ្យ​ផុងកាង​ និង​បែក​ស្តុបបន្តិចបន្តួច​ប៉ុណ្ណោះ តែ​មិន​បង្ក​ឲ្យ​មាន​អ្នក​រង​របួស​នោះ​ទេ​។

សាក្សីបានបន្ថែមថា បន្ទាប់​មក ​ភាគី​ទាំង​សងខាងក៏​បានដោះស្រាយគ្នា ដោយ​ភាគី​ខាង​រថយន្ត​បាន​ទាមទារ​សំណង​ចំនួន​១០០ដុល្លារប៉ុណ្ណោះ​ ពីភាគី​ខាង​ម៉ូតូតែបុរសម្ចាស់​ម៉ូតូព្រមសងតែ៥០ដុល្លារទេ ធ្វើឲ្យ​ការដោះស្រាយ​មិនត្រូវគ្នា ទើប​មួយសន្ទុះក្រោយមក បុរសដែល​ជាអ្នក​បើកបរ​ម៉ូតូ​បានសុំសងសំ​ណងទៅភាគី​ខាង​រថយន្ត​ចំនួន​៦០ដុល្លារ​ ដើម្បីបញ្ចប់រឿង​ តែ​ភាគី​ខាង​រថយន្ត​មិន​ព្រម​ទទួល​ទេ​។ ភ្លាម​នោះ ​បុរស​ជាអ្នកបើក​ម៉ូតូ​បានឡើងម៉ូតូរបស់ខ្លួនជិះទៅបាត់ បន្សល់ទុកនារីជាសង្សារនៅ​នឹងកន្លែងកើតហេតុ។

ក្រោយ​ពេល​កើត​ហេតុ ​នារីរូបស្រស់ ដែលជាសង្សារបុរសម្ចាស់ម៉ូតូបានហៅម៉ូតូ​ឌុបបម្រុងជិះ​ចេញ​ពី​កន្លែង​កើត​ហេតុ​ដែរ តែ​ត្រូវ​អ្នកបើកបររថយន្តឃាត់​មិនឲ្យទៅក៏បង្កឲ្យមានការឈ្លោះប្រកែកយ៉ាងតឹងសរសៃក​ដាក់គ្នា ទើបមួយសន្ទុះក្រោយ​មក​នារីរូបស្រស់ ព្រមជួយចេញសំណងជំនួសសង្សាររបស់ខ្លួនចំនួន៥០ដុល្លារ ឲ្យទៅ​ភាគីខាងរថយន្ត​ ក៏ភាគី​ខាង​រថយន្តយល់​ព្រម​ទទួល​យក​ ដើម្បីបញ្ចប់រឿងនៅនឹងកន្លែងកើតហេតុ៕

@Amapapa.News

Feature Ads