ភ្នំពេញៈ នាយករដ្ឋមន្ដ្រីកម្ពុជា សម្តេចតេជោ ហ៊ុន សែន បានបញ្ជាក់ថា នៅរាជធានីភ្នំពេញ ប៉ុន្មានថ្ងៃនេះ ភ្លៀងនោះភ្លៀង ស្ទើរតែអុំទូកបានហើយ ប៉ុន្តែនៅប្រទេសគេក៏មានភ្លៀងមិនខុសពីកម្ពុជា ខណៈភ្លៀងភាគច្រើននៅភ្នំពេញ នៅខេត្តមិនសូវមានភ្លៀងនោះទេ។
នៅក្នុងពិធីជួបសំណេះសំណាលជាមួយកម្មករ កម្មការិនី នៅខេត្តកំពង់ឆ្នាំង នៅថ្ងៃទី២៧ ខែមិថុនា ឆ្នាំ២០១៨ សម្ដេច ហ៊ុន សែន មានប្រសាសន៍ថា “ភ្នំពេញ ក្លាយជាទន្លេភ្នំពេញ២ថ្ងៃនេះ អុំទូកបានលូធំប៉ុណ្ណា ក៏ទប់មិនជាប់ដែរ។ មានតែវិមានឯករាជ្យនិងព្រះបរមរាជវាំងទេដែលខ្ពស់ជាងនីវ៉ូទឹកសមុទ្រនោះ ក្រៅពីហ្នឹងទាបជាង ទាំងអស់ ។ ឆ្នាំនេះទឹកភ្លៀងល្អ កសិកម្មយើងក៏ល្អដែរ”៕