ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា CMAC បានប្រាប់ឱ្យដឹងថា រាជរដ្ឋាភិបាលកម្ពុជាបានសម្រេចបញ្ចូលមន្ត្រី និងបុគ្គលិក របស់ស៊ីម៉ាក់ទាំងអស់ចូលក្នុងក្របខណ្ឌកងយោធពលខេមរភូមិន្ទ នៃក្រសួងមហាផ្ទៃ នៅពេលពួកគាត់បញ្ចប់ភារកិច្ចក្នុងកិច្ចសន្យា និងចូលនិវត្តន៍ ពលី ពិការ បាត់បង់សមត្ថភាពពលកម្មជាដើម។
ឯកឧត្តម ហេង រតនា បានពន្យល់ថាការបញ្ចូលមន្ត្រី និងបុគ្គលិករបស់ស៊ីម៉ាក់ ទៅក្នុងក្របខណ្ឌក្រសួងការពារជាតិនេះ មិនមែនជាកងទ័ព និងមានសក្តិពាក់នោះទេ ហើយមិនមែនបើកពីក្រសួងការពារជាតិ ឬពីស្ថាប័នរដ្ឋណាមួយឡើយ។ ប៉ុន្តែមន្ត្រីនិងបុគ្គលិកទាំងអស់បើកប្រាក់ខែពី CMAC ដដែល។
ទោះជាយ៉ាងណា លោកអគ្គនាយករូបនេះ បានប្រាប់ពីអត្ថប្រយោជន៍នៃការចូលក្របខណ្ឌនេះ គឺពួកគេទទួលបានប្រាក់សោធននិវត្តន៍ពីរដ្ឋ ពីព្រោះកន្លងមកពួកគេមិនទទួលបានទេ ដោយសារមិនមែនជាក្របខណ្ឌរដ្ឋ ហើយមានអ្នកខ្លះមានជីវភាពលំបាក ពេលចូលនិវត្តន៍។
ឯកឧត្តម ហេង រតនា បានបន្ថែមទៀតថា ការបញ្ចូលក្របខណ្ឌមន្ត្រី CMAC ជាគុណបំណាច់ ដែលពួកគេបានបម្រើការងារកំចាត់មីនជាង២៥ឆ្នាំហើយ ដោយអ្នកខ្លះ ក៏ធ្លាប់មានអតីតភាពជាកងកម្លាំងប្រដាប់អាវុធផងដែរ។
សូមបញ្ជាក់ថា បច្ចុប្បន្ននេះ មន្ត្រី និងបុគ្គលកំពុងបម្រើការងារនៅក្នុង មជ្ឈមណ្ឌលសកម្មភាពកំចាត់មីនកម្ពុជា មានប្រមាណ ១ ៨00នាក់។