Friday, June 22, 2018

សូមកុំភ្ញាក់ផ្អើល! ស្អែកនេះ នឹងមានការចល័តកងទ័ព តាមផ្លូវជាតិលេខ៥

អាម៉ាប៉ាប៉ាញ៉ូស

ភ្នំពេញៈ បញ្ជាការដ្ឋានអង្គរក្ស នឹងធ្វើការការចល័តកងកម្លាំង និងយោធបរិក្ខារ តាមបណ្ដោយផ្លូវជាតិលេខ៥ នៅថ្ងៃទី២៣ ខែមិថុនា ឆ្នាំ២០១៨​ ស្អែកនេះ។

សេចក្តី​ជូន​ដំណឹង​របស់​បញ្ជាការដ្ឋានអង្គរក្ស ចេញ​ថ្ងៃព្រហស្បតិ៍ ៩កើត ខែមឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២១ ខែមិថុនា ឆ្នាំ២០១៨ថា សូមជម្រាបជូន​អាជ្ញាធរ​មានសមត្ថកិច្ច តាមបណ្ដោយផ្លូវជាតិលេខ៥ និងអាជ្ញាធរ​រាជធានីភ្នំពេញ ខេត្តកណ្ដាល ឲ្យបានជ្រាបថា បញ្ជា​ការដ្ឋានអង្គរក្ស នឹងធ្វើការ​ចល័យកងកម្លាំង និងយោធបរិក្ខារ ចេញពីទីបញ្ជាការដ្ឋានអង្គរក្ស នៅថ្ងៃទី២៣ ខែមិថុនា ឆ្នាំ២០១៨ ដើម្បីទៅចូលរួមក្នុងពិធីព្យុហយាត្រា នៅទីបញ្ជាការយោធភូមិភាគទី៥ (ទីរួមខេត្តបាត់ដំបង) ដែលគ្រោងនឹងប្រារព្ធពិធីខួបអនុស្សាវរីយ៍លើកទី៣០ នៃថ្ងៃកំណើតយោធភូមិភាគទី៥ នៅថ្ងៃទី២៨ ខែមិថុនា ឆ្នាំ២០១៨។ ក្រោយបញ្ចប់​កម្មវិធី ត្រូវចល័ត​កម្លាំង និងយោធបរិក្ខារត្រឡប់មកទីបញ្ជាការ​ បញ្ជា​ការដ្ឋាន​អង្គរក្សនៅតាខ្មៅ ខេត្តកណ្ដាលវិញ។

សេចក្តីដូចបានជម្រាបជូនខាងលើនេះ សូមអាជ្ញាធរ​មានសមត្ថកិច្ច តាមបណ្ដោយផ្លូវជាតិលេខ៥ និងអាជ្ញាធរ​រាជធានីភ្នំពេញ ខេត្តកណ្ដាល មេត្តាជ្រាប និងផ្សព្វផ្សាយ​ជូនដល់ប្រជាពលរដ្ឋ​ ដែលរស់នៅ​តាមដងផ្លូវ កុំឲ្យមានការ​ភា្ញក់ផ្អើល ជាពិសេស​ក្រែងមានជនអគតិ​មួយចំនួន​យកទៅឃោសនាបំភាន់ខុសពីការពិត៕

@Amapapa.News

Feature Ads