ព្រះសីហនុ ៖ ក្រោយពីព្រះទីនាំង សម្ដេចក្រុមព្រះ នរោត្តម រណឬទ្ធិ និងអ្នកម្នាង ជួបគ្រោះថ្នាក់ចរាចរណ៍ដ៏រន្ធត់នាវេលាម៉ោង៨៖៥០នាទីព្រឹក ថ្ងៃអាទិត្យ ទី១៧ ខែមិថុនា ឆ្នាំ២០១៨ នៅលើកំណាត់ផ្លូវជាតិលេខ៤ ចន្លោះគីឡូម៉ែត្រ២០០-២០១ ដោយស្ថានភាពអ្នកម្នាង អ៊ុក ផល្លា មានសភាពធ្ងន់ធ្ងរពេក រហូតមកដល់ម៉ោង ជាង១២ ថ្ងៃត្រង់ នេះ អ្នកម្នាង បានសោយទិវង្គតហើយ នេះបើយោងតាមស្នងការនរគបាលខេត្តព្រះសីហនុ លោក ឧត្តមសេនីយ៍ទោ ជួន ណារិន្ទ ។
បើតាមការបញ្ជាក់ អ្នកម្នាង បានរងគ្រោះ រហូតដល់បែកថ្លើម ដោយឡែក សម្ដេចក្រុមព្រះ នរោត្តម រណឬទ្ធិ បានយាងតាមឧទ្ធម្ភាចក្រ មកសង្គ្រោះបន្តនៅរាជធានីភ្នំពេញហើយ ។
សូមជម្រាបជូនថា គ្រោះថ្នាក់ចរាចរណ៍ដ៏រន្ធត់នេះ បានកើតឡើងនាវេលាម៉ោង៨៖៥០នាទីព្រឹក ថ្ងៃអាទិត្យ ៥កើត ខែបឋមាសាធ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៧ ខែមិថុនា ឆ្នាំ២០១៨នេះ នៅលើកំណាត់ផ្លូវជាតិលេខ៤ ចន្លោះគីឡូម៉ែត្រ២០០-២០១ ស្ថិតនៅក្នុងភូមិអូរតាសេក ឃុំអូរឧកញ៉្ញាហេង ស្រុកព្រៃនប់ ខេត្តព្រះសីហនុ។
