ភ្នំពេញៈ ការធ្វើចរាចរឆ្លងកាត់ចំណុចរង្វង់មូលចោមចៅ នឹងត្រូវពង្វាងបណ្ដោះអាសន្នចាប់ពីព្រឹកព្រលឹមស្អែកនេះ ដើម្បីផ្ដល់លទ្ធភាពដល់ដំណើរការពិធីបើកការដ្ឋានសាងសង់ស្ពានអាកាស និងផ្លូវក្រោមដីចោមចៅ ដែលនឹងប្រព្រឹត្តទៅចាប់ពីម៉ោង៦៖០០នាទីព្រឹក ដល់ម៉ោង១២៖០០នាទីថ្ងៃត្រង់ ថ្ងៃទី២៩ ខែមិថុនា ឆ្នាំ២០១៨ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ដ្រី។ នេះបើយោងសេចក្ដីជូនដំណឹងរបស់អាជ្ញាធរក្រុងភ្នំពេញ កាលពីថ្ងៃទី២៧ ខែមិថុនា។
រដ្ឋបាលរាជធានីភ្នំពេញ ជូនដំណឹងឲ្យប្រជាពលរដ្ឋ ជាពិសេសម្ចាស់រថយន្ដដឹកទំនិញគ្រប់ប្រភេទ និងម្ចាស់រថយន្ដដឹកអ្នកដំណើរ មានបំណងឆ្លងកាត់ចំណុចរង្វង់មូលចោមចៅ ត្រូវពង្វាងចរាចរណ៍ចេញ-ចូលរាជធានីភ្នំពេញ ទៅតាមទិសដៅដូចខាងក្រោម៖
១/ ចំពោះរថយន្ដចរាចរមកពីទិសខាងលិច តាមបណ្ដោយផ្លូវជាតិលេខ៤ ចូលរាជធានីភ្នំពេញ ត្រូវធ្វើដំណើរតាមផ្លូវពង្វាងទៅតាមផ្លូវបែកចាន បត់ស្ដាំទៅទិសខាងត្បូង ឬផ្លូវកប់ស្រូវ បត់ឆ្វេងទៅទិសខាងជើង។
២/ ចំពោះរថយន្ដចរាចរមកពីផ្លូវជាតិលេខ៣ ចូលរាជធានី ត្រូវធ្វើដំណើរតាមផ្លូវពង្វាង បត់ស្ដាំទៅតាមផ្លូវព្រៃស មុខវត្តស្លែង ឬទៅតាមផ្លូវទួលពង្រ បត់ស្ដាំតាមផ្លូវ៣០ម៉ែត្រ ឆ្ពោះទៅផ្លូវចោមចៅ។
៣/ ចំពោះរថយន្ដធ្វើចរាចរតាមផ្លូវចោមចៅ ចេញក្រៅរាជធានី ទៅផ្លូវជាតិលេខ៣ ត្រូវធ្វើដំណើរតាមផ្លូវទួលពង្រ បត់ឆ្វេងត្រង់ចំណុចស្ដុប។
និងទី៤/ ចំពោះចរាចរណ៍ពីផ្លូវចោមចៅ ឆ្ពោះទៅផ្លូវជាតិលេខ៤ អនុញ្ញាឲ្យចរាចរធម្មតា។
បើតាមគម្រោង ការដ្ឋានសង់ស្ពានអាកាស និងផ្លូវក្រោមដីនៅរង្វង់មូលចោមចៅ គ្រោងនឹងប្រើរយៈពេល២០ខែ ដើម្បីស្ថាបនាឲ្យរួចរាល់ ដោយសារបច្ចុប្បន្ននេះ ស្ថានភាពចរាចរណ៍នៅចំណុចរង្វង់មូលចោមចៅ ក្នុងខណ្ឌពោធិ៍សែនជ័យ មានការកកស្ទះចរាចរណ៍ស្ទើររាល់ថ្ងៃ នៅតាមផ្លូវជាតិលេខ៤ ផ្លូវជាតិលេខ៣ និងមហាវិថីសហព័ន្ធរុស្ស៊ី។
សូមបញ្ជាក់ថា ចំពោះថវិកាសាងសង់ស្ពានអាកាស និងផ្លូវក្រោមដីនេះ ជាថវិការបស់សាលារាជធានីភ្នំពេញ ដោយប្រើប្រាស់ការស្ថាបនា ខណៈដែលកំណាត់មហាវិថីសហពន្ធ័រុស្ស៊ី ចាប់ពីផ្លូវលេខ២០១១ ដល់រង្វង់មូលចោមចៅ ត្រូវបានពង្រីកបន្ថែមឲ្យធំទូលាយ អាចឲ្យរថយន្តធ្វើចរាចរចំនួយ៣គន្លង ចូលក្នុងក្រុង និង៤គន្លង ចេញក្រៅក្រុង ដោយមានសួនច្បារនៅចំកណ្តាល និងមានដាក់ប្រព័ន្ធលូ២ខ្សែ គឺ១ខ្សែ នៅចំកណ្តាលសួន និង១ខ្សែទៀត ដាក់នៅចិញ្ចើមផ្លូវ ត្រូវបានស្ថាបនារួចហើយ៕