ប៉ៃលិនៈ យុវជនប្រុសស្រីចំនួន៤នាក់ បានរងរបួសធ្ងន់ស្រាល ក្រោយពីម៉ូតូហុងដាឌ្រីម២គ្រឿងបោលបុកក្នុងទិសដៅបញ្ច្រាសគ្នាពេញទំហឹង។
គ្រោះចរាចរណ៍នេះ កើតឡើងកាលពីវេលាម៉ោង១២៖៣៩ នាទីថ្ងៃត្រង់ ថ្ងៃពុធ ៨កើត ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២០ ខែមិថុនា ឆ្នាំ២០១៨ ត្រង់ចំណុចភូមិទឹកផុស សង្កាត់ប៉ៃលិន ក្រុងប៉ៃលិន ខេត្តប៉ៃលិន។
សមត្ថកិច្ច បានឲ្យដឹងថា គ្រោះថ្នាក់ចរាចរណ៍នេះ បង្កឡើងរវាងម៉ូតូម៉ាក HONDA Dream សេរីឆ្នាំ២០១១ ពណ៌ខ្មៅ ពាក់ស្លាកលេខ ប៉ៃលិន 1A-6352 បុកបញ្ច្រាសទិសគ្នា ជាមួយម៉ូតូម៉ាក HONDA dream សេរីឆ្នាំ ២០០៩ ពណ៌ខ្មៅ ពាកស្លាកលេខ ប៉ៃលិន 1A-7631 បណ្តាលឲ្យរងរបួសមនុស្ស៤នាក់ (ស្រាល២នាក់, ធ្ងន់២នាក់) ម៉ូតូទាំងពីរគ្រឿងខូចខាតធ្ងន់។
សមត្ថកិច្ច បានបន្តថា ជនរងគ្រោះឈ្មោះ ឆាង នឿន ភេទប្រុស អាយុ១២ឆ្នាំ ជនជាតិខ្មែរ រស់នៅភូមិឃុំកើតហេតុខាងលើ ជិះម៉ូតូ HONDA Dream សេរីឆ្នាំ២០១១ ម្នាក់ឯង រងរបួសស្រាល។ ចំណែកភាគីម្ខាងម៉ូតូម៉ាក HONDA dream សេរីឆ្នាំ ២០០៩ មានគ្នា៣នាក់បើកបរដោយឈ្មោះ វិន ភេទប្រុស អាយុ២២ឆ្នាំ ជនជាតិខ្មែរ រស់នៅភូមិឃុំកើតហេតុខាងលើ របួសស្រាល និងរួមដំណើរទី១ ឈ្មោះ ណយ ដេន ភេទស្រីអាយុ ១៩ឆ្នាំ ជនជាតិខ្មែរ របួសធ្ងន់ ២-ឈ្មោះ ម៉ាត់ ភេទប្រុស អាយុ២១ឆ្នាំ ជនជាតិខ្មែរ អ្នកទាំងពីរនេះ រស់ភូមិអាឡាំទទឹង ខេត្តពោធិ៍សាត់។
ក្រោយកើតហេតុជនរងគ្រោះត្រូវបានទៅសង្គ្រោះនៅមន្ទីរពេទ្យ ដោយម៉ូតូទាំង២គ្រឿង ត្រូវបានកម្លាំងជំនាញការិយាល័យនគរបាលចរាចរណ៍ផ្លូវគោក យកមករក្សាទុកនៅស្នងការដ្ឋាននគរបាលខេត្តប៉ៃលិន ដើម្បីរង់ចាំធ្វើការដោះស្រាយ៕
