បាត់ដំបងៈ កម្លាំងការិយាល័យប្រឆាំងគ្រឿងញៀន សហការជាមួយកម្លាំងក្រុមអន្តរាគមន៍ប្រឆាំងបទល្មើសនៃស្នងការដ្ឋាននគរបាលខេត្តបាត់ដំបង ចុះបង្ក្រាបករណីជួញដូរគ្រឿងញៀន ឃាត់ខ្លួនជនសង្ស័យ២នាក់ រកឃើញថ្នាំញៀនជាច្រើនកញ្ចប់ និងកាំភ្លើងខ្លីមួយដើម។
ប្រតិបត្តិការខាងលើនេះ ធ្វើឡើងកាលពីវេលាម៉ោង១០៖២០នាទីព្រឹកថ្ងៃទី២៦ ខែមិថុនា ឆ្នាំ២០១៨ នៅចំណុចក្រុមទី៣ ភូមិព្រៃដំរី ឃុំព្រៃតូច ស្រុកមោងឫស្សី ខេត្តបាត់ដំបង។
ជនសង្ស័យទី១ ឈ្មោះ មឿន សេងអ៊ូ ហៅសារ៉ាត ភេទប្រុស អាយុ៣៣ឆ្នាំ មានទីលំនៅភូមិទី៦ ឃុំស្វាយឃ្លាំង ស្រុកក្រូចឆ្មារ ខេត្តត្បូងឃ្មុំ។ ទី២ ឈ្មោះ ឡេង តេងឡុង ភេទប្រុស អាយុ៣៣ឆ្នាំ មានទីលំនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ក្រោយឃាត់ខ្លួនសមត្ថកិច្ច បានដកហូតវត្ថុតាងរួមមាន ៖ ថ្នាំញៀនប្រភេទមេតំហ្វេតាមីន (ម៉ាទឹកកក ICE ) ចំនួន១១ថង់ ទម្ងន់១១២.៩៤ក្រាម(ទាំងសំបក) រថយន្ត១គ្រឿង ម៉ាលឡិចស៊ីស RX300 ពណ៌ស សេរីឆ្នាំ២០០០ ពាក់ស្លាកលេខ ភ្នំពេញ2S-7747 កាំភ្លើងខ្លី១ដើម ម៉ាករ៉ូឡូ៦អ៉ីង លេខ៧០៨៧៩១ គ្រាប់១២គ្រាប់ កូនជញ្ជីងសម្រាប់ថ្លឹងថ្នាំញៀន១ និងកាបូបដាក់លុយ២។
បច្ចុប្បន្នជនសង្ស័យ និងវត្ថុតាងខាងលើ ត្រូវបានសមត្ថកិច្ចកសាងសំណុំរឿងបញ្ជូនទៅតុលាការរួចរាល់ហើយ៕