កីឡាៈ កីឡាករ ចាន់ វឌ្ឍនាកា សមាជិកក្រុមជម្រើសជាតិកម្ពុជា ដែលទើបតែផ្តាច់កិច្ចសន្យាជាមួយក្លិប Pahang FA សមាជិកពានរង្វាន់លីគកំពូលម៉ាឡេស៊ី នាពេលកន្លងទៅ នៅពេលនេះបានសម្រេចចិត្តចូលរួមជាមួយក្រុមចាស់បឹងកេត វិញហើយ បើទោះបីជាមានការចចារពីក្លិបបរទេសមួយចំនួនក៏ដោយ។
ដំណើរត្រឡប់មកមាតុភូមិវិញរបស់ ចាន់ វឌ្ឍនាកា គឺមានបេសកម្មជួយក្រុមបឹងកេត ប្រកួតក្នុងជើងទី២នៃពានរង្វាន់លីគកំពូលកម្ពុជា Metfone Cambodian League 2018 និងពានរង្វាន់សម្តេចតេជោ ហ៊ុន សែន ឆ្នាំ២០១៨ ចាប់ពីខែកក្កដា តទៅ។
ក្នុងសន្និសិទសារព័ត៌មានផ្លូវការនៅរសៀលថ្ងៃសៅរ៍ ទី២៣ ខែមិថុនា ឆ្នាំ២០១៨ នេះកីឡាករ ចាន់ វឌ្ឍនាកា បានលើកឡើងថា «មានហេតុផល៣យ៉ាងដែលខ្ញុំសម្រេចមកបន្តអាជីពនៅកម្ពុជាវិញព្រោះ ទី១.ខ្ញុំមើលឃើញសក្ដានុពលរបស់លីគកំពូលកម្ពុជា បច្ចុប្បន្ន មានក្រុមដែលអាចប្រកួតប្រជែងគ្នាច្រើន ទី២.ខ្ញុំឃើញចក្ខុវិស័យ និងមានឆន្ទៈខ្ពស់របស់ថ្នាក់ដឹកនាំក្នុងការដឹកនាំក្លិប និងទី៣.គឺក្រុមទាំងមូល មានឆន្ទៈចង់ឈ្នះលីគកំពូលកម្ពុជា ដែលធ្វើឲ្យខ្ញុំមានឆន្ទៈចង់បានលេងនៅកម្ពុជាវិញ»។
លោក បែ មករា អ្នកចាត់ការទូទៅរបស់ក្រុមបឹងកេត រីករាយនឹងដំណើរត្រឡប់មកវិញរបស់ ចាន់ វឌ្ឍនាកា ដោយចូលរួមជាមួយក្រុមលោក។ លោកជឿជាក់ថា ក្រុមនឹងអាចបន្តឱកាសប្រជែងពានរង្វាន់បានទៀតនៅឆ្នាំនេះ ព្រោះថាក្រុមលោកសំបូរទៅដោយកីឡាករឆ្នើមៗបរទេសដែលមានស្រាប់ដូចជា Maycon Calijuri, Samuel Ajayi, Julius Oiboh, Esoh Paul Omogba និងHikaru Mizuno ជាដើម។
កីឡាករ ចាន់ វឌ្ឍនាកា ជាអតីតយុវជនរបស់ក្លិបព្រះខ័នរាជស្វាយរៀង (ព្រះខ័នរាជ) ដែលចាប់អាជីពដំបូងកាលពីឆ្នាំ២០១១ នៅក្នុងឈុតធំក្រុមនេះ ស្របពេលនៅឆ្នាំ២០១២ រូបគេបានផ្ទេរទៅកាន់ក្លិបបឹងកេត រហូតដល់ចុងឆ្នាំ២០១៦ មុនចេញទៅជប៉ុន ដោយចូលរួមជាមួយក្លិប Fujieda MYFC សមាជិកពានរង្វាន់លីគលំដាប់ទី៣ (J3-league)។
នៅដើមឆ្នាំ២០១៨ ក្រោយចប់កិច្ចសន្យានៅប្រទេសជប៉ុន ចាន់ វឌ្ឍនាកា បានបន្តដំណើរទៅប្រទេសម៉ាឡេស៊ី ជាមួយ Pahang FA ខណៈដែលចាយពេលប្រហែល៣ខែក៏ក្លិបនេះបានសម្រេចបញ្ចប់កិច្ចសន្យាជាមួយ ចាន់ វឌ្ឍនាកា តែម្តង៕