Thursday, June 21, 2018

ប៉ូលិសផ្កាយ២ និងយោធាស័ក្តិ៤កន្លះ រងបណ្តឹង បោកលុយរាប់ម៉ឺនដុល្លារ រឿងរត់ការចូលក្របខ័ណ្ឌ

អាម៉ាប៉ាប៉ាញ៉ូស

ភ្នំពេញៈ ទឹកប្រាក់រាប់ម៉ឺនដុល្លារ ដែលជនរងគ្រោះជាច្រើននាក់ បានចាញ់បោក លោកផ្កាយ២ មន្រ្តីប៉ូលិស ក្រសួងមហាផ្ទៃម្នាក់ និងលោក ស័ក្តិ ៤កន្លះ ជាមន្រ្តីយោធាម្នាក់ ដោយពួកគេទាំងពីរនាក់នេះ បានដើរឃោសនា អួតអាង ជាក្មួយលោកផ្កាយ៤ សុខ ផល ដែលអាចរត់ការ អោយបានចូល ក្របខ័ណ្ឌមន្រ្តីនគរបាលជាតិ និង បានចូលជាមន្រ្តីយោធា។

ក្រោយពីប្រជាពលរដ្ឋ រងគ្រោះបានដឹងពីគំនិតមិនល្អ របស់ពួកគេទាំង២នាក់ហើយនោះ ពលរដ្ឋក៏បាន ដាក់ពាក្យប្តឹងទៅក្រសួងមហាផ្ទៃ និង ស្នងការដ្ឋាននគរបាលខេត្តព្រះវិហារ ពាក់ព័ន្ធជនឆបោកទាំង២នាក់នេះ ដោយម្នាក់ ឈ្មោះ ជុំ សុខឿន ឋាន្តរស័ក្តិ ឧត្តមសេនីយ៍ទោ ផ្កាយ២ ក្រសួងមហាផ្ទៃ និងម្នាក់ទៀត ឈ្មោះ គឹម ឬទ្ធី មានឋាន្តរស័ក្តិ ពាក់ស័ក្តិ៤កន្លះ អត្តលេខ ០២៥១៨៩ មន្រ្តីយោធានៅកងពលលេខ២ ប្រចាំទិសប្រាសាទព្រះវិហារ។

យោងតាមពាក្យបណ្តឹងដែល Campost ទទួលបាន នៅថ្ងៃទី២១ ខែមិថុនា ឆ្នាំ២០១៨ នេះថា ដោយសារតែជនរងគ្រោះ ជឿតាមការ អះអាង ថាខ្លួន (ឈ្មោះ ជុំ សុខឿន) ជាក្មួយ របស់ លោក សុខ ផល អគ្គស្នងការរងនគរបាលជាតិ អាច រត់ការ អោយបានចូលក្របខ័ណ្ឌ នគរបាលជាតិ ទើបបណ្តាលអោយ ជនរងគ្រោះមានការទុកចិត្ត ឈានដល់ ចាញ់បោក ជនទាំងពីរនេះ សរុប រាប់ម៉ឺនដុល្លារ។

បច្ចុប្បន្ន ឈ្មោះ ជុំ សុខឿន និង ឈ្មោះ គឹម ឬទ្ធី កំពុងគេចខ្លួន ក្រោយយកលុយ ពីជនរងគ្រោះជាច្រើននាក់ ទើបជនរងគ្រោះ សម្រេចចិត្តដាក់ពាក្យប្តឹង៕

@Amapapa.News

Feature Ads