ខណៈដែលការបោះឆ្នោតជ្រើសរើសតំណាងរាស្រ្តនីតិកាលទី៦កាន់តែខិតជិតមកដល់ អង្គការសង្គមស៊ីវិលដែលធ្វើការលើការងារបោះឆ្នោតបានប្រកាសមិនចូលរួមសង្កេតការណ៍។ ជាការឆ្លើយតប ឯកឧត្តម ហង្ស ពុទ្ធា អ្នកនាំពាក្យ គ.ជ.ប អះអាងថា អ្នកសង្កេតការណ៍ ការបោះឆ្នោតតាមការិយាល័យនាពេលខាងមុខនេះ មានការកើនឡើងហួសពីការស្មាន។
ឯកឧត្តម ហង្ស ពុទ្ធា អ្នកនាំពាក្យ គ.ជ.ប អះអាងថាអ្នកសង្កេតការណ៍ការបោះឆ្នោតតាមការិយាល័យសម្រាប់ការបោះឆ្នោតនីតិកាលទី៦ពេលខាងមុខនេះ មានការកើនឡើងហួសពីការស្មាន។
លោកបន្ថែមថាទោះបីជារហូតមកដល់ពេលនេះ មានអង្គការសង្គមស៊ីវិលខ្លះប្រកាសមិនសង្កេតការណ៍ក៏ដោយ ប៉ុន្តែ គ.ជ.ប បានទទួលស្គាល់ ៦០ អង្គការសង្គមស៊ីវិល អ្នកសង្កេតការណ៍ជាង៣៤,០០០នាក់រួចហើយ ក្នុងនោះអ្នកសង្កេតការណ៍អន្តរជាតិមានចំនួន ១៣រូប (អាស៊ី រុស្ស៊ី មីយ៉ាន់ម៉ា សឹង្ហបុរី) គិតត្រឹមថ្ងៃទី១៧ ខែមិថុនា ឆ្នាំ២០១៨។
លោកសង្កត់ធ្ងន់ថា មុនការបោះឆ្នោតមួយថ្ងៃពោលគឺនៅថ្ងៃទី២៨ ខែកក្កដា ឆ្នាំ២០១៨ ខាងមុខ អ្នកសង្កេតការណ៍អន្តរជាតិប្រមាណ៣០នាក់ទៀត នឹងមកដល់ប្រទេសកម្ពុជា។
បច្ចុប្បន្ននេះ តួលេខនៃអ្នកសង្កេតការណ៍ការបោះឆ្នោតតាមការិយាល័យ មានការកើនឡើងហួសពីការស្មាន ប្រសិន បើ២០គណបក្សនយោបាយ ហើយក្នុងគណបក្សនយោបាយមួយ មានអ្នកសង្កេតការណ៍ម្នាក់ មន្ត្រីរៀបចំការបោះឆ្នោត៥នាក់ ហើយប្រជាពលរដ្ឋ ២ឬ៣នាក់ទៀត ដូច្នេះអ្នកអ្នកសង្កេតការណ៍ការបោះឆ្នោតតាមការិយាល័យ មិនមែនជាបញ្ហាសម្រាប់គ.ជ.ប នោះទេ។
សូមបញ្ជាក់ថាថ្ងៃទទួលពាក្យសម្រាប់អ្នកសង្កេតការណ៍ការបោះឆ្នោតតាមការិយាល័យ រហូតដល់ថ្ងៃទី១៨ ខែកក្កដា ឆ្នាំ២០១៨។
គួររំលឹកថា អង្គការតម្លាភាពកម្ពុជា ក្នុងចំណោមអង្គការ២ផ្សេងទៀតបានចេញប្រកាសថាខ្លួនមិនចូលរួមសង្កេតការណ៍ការបោះឆ្នោតនីតិកាលទី៦ ខាងមុខនោះទេ។