ភ្នំពេញៈ គួរឲ្យអាសូរណាស់! ខណៈពេលមេឃកំពុងតែរលឹមធ្លាក់ភ្លៀង មានបុរសម្នាក់ បានដួលបោកក្បាលស្លាប់ភ្លាមៗ ទាំងក្បាលព្រលប់ម្សិលមិញនេះ បន្ទាប់ពីជិះម៉ូតូមួយគ្រឿង ដឹកធុងហ្គាសយកទៅដាក់ឲ្យគេដល់ផ្ទះ តែពេលត្រឡប់មកវិញ ជ្រុលជិះឡើងខឿនផ្លូវបេតុង ទើបតែធ្វើថ្មី បណ្ដាលឲ្យដួលបោកក្បាលស្លាប់ភ្លាមៗតែម្ដង។
ហេតុការណ៍គ្រោះថ្នាក់ចរាចរណ៍ដួលដោយខ្លួនឯងនេះ បានកើតឡើងនៅវេលាម៉ោងជាង៧យប់ ថ្ងៃសៅរ៍ ទី២៣ ខែមិថុនា ឆ្នាំ២០១៨នេះ ត្រង់ចំណុចផ្លូវលំ(ផ្សារក្រមួន) ស្ថិតក្នុងភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
សមត្ថកិច្ចប៉ុស្តិ៍ចាក់អង្រែក្រោម ប្រាប់ភ្នាក់ងារ CAM POST ថា សពជនរងគ្រោះឈ្មោះ ធឿន ភេទប្រុស អាយុ២៣ មុខរបរកម្មករដឹកហ្គាស នៅផ្សារតាខ្មៅថ្មី និងមានស្រុកកំណើតនៅខេត្តព្រៃវែង ដែលជិះម៉ូតូមួយគ្រឿងម៉ាក Smash V ពណ៌ខ្មៅ ពាក់ស្លាកលេខ កណ្តាល 1C-0817 ដែលដឹកធុងហ្គាសយកទៅឲ្យគេនៅក្នុងច្រកចូលផ្សារក្រមួន។
នៅមុនពេលកើតហេតុ គេឃើញបុរសម្នាក់ បានជិះម៉ូតូមួយគ្រឿង ដឹកធុងហ្គាសយកទៅដាក់ឲ្យគេដល់ផ្ទះ លុះត្រឡប់មកវិញ បានធ្វើដំណើរតាមផ្លូវលំដែលទើបចាក់បេតុងថ្មីដដែលនោះ ទិសដៅពីលិចទៅកើត តែជ្រុលជិះឡើងខឿនផ្លូវបេតុង ក៏ទើសជាមួយសរសៃដែក ដែលគេទុកសម្រាប់ចាក់ផ្លូវបេតុងបន្តនោះ បណ្ដាលដួលបោកក្បាលស្លាប់ភ្លាមៗនៅកន្លែងកើតហេតុតែម្ដង។
ក្រោយពេលកើតហេតុ សមត្ថកិច្ចផ្នែកចរាចរណ៍ខណ្ឌមានជ័យ ធ្វើការវាស់វែង រួចយកម៉ូតូទៅរក្សាទុកនៅប៉ុស្តិ៍នគរបាលចាក់អង្រែក្រោម រង់ចាំសាច់ញាតិ ឬម្ចាស់ម៉ូតូមកយកទៅវិញ។ ចំណែកសពត្រូវសមត្ថកិច្ចធ្វើកំណត់ហេតុ ប្រគល់ទៅឲ្យម្ចាស់ក្រុមហ៊ុនហ្គាសទាក់ទងហៅរថយន្តសាមុយរបស់ស្នងការដ្ឋាននគរបាលខេត្តកណ្តាល មកដឹកយកទៅរក្សាទុកនៅមន្ទីរពេទ្យជ័យជំនះ រង់ចាំសាច់ញាតិមកទទួលយកទៅធ្វើបុណ្យ៕