Tuesday, June 5, 2018

សមត្ថកិច្ច ឃាត់ខ្លួន ចិនពាក់ផ្កាយ១​ រូបនេះហើយ ដោយប្រព្រឹត្តល្មើស​ ២មាត្រា

អាម៉ាប៉ាប៉ាញ៉ូស

វីដេអូប្រមាណ១១វិនាទី របស់ជនជាតិចិន ដែលមិនចេះនិយាយភាសាខ្មែរហើយ ពាកឯកសណ្ឋានកងយោធពលខេមរៈភូមិន្ទ​ ធ្វើឲ្យមានការរិះគន់ពេញបណ្ដាញសង្គមហ្វេសប៊ុក ។

ភ្លាមៗបន្ទាប់ពីវីដេអូ ត្រូវបានបង្ហោះចូលបណ្ដាញសង្គម នៅយប់រំលងអាធ្រាតថ្ងៃទី​ ៤​ ឆ្លងចូលថ្ងៃទី​ ៥​ ខែ​ មិថុនា​ ឆ្នាំ​ ២០១៨​ សមត្ថកិច្ច​កងរាជអាវុធហត្ថ​ខេត្ត​ព្រះសីហនុ​ ដឹកនាំដោយ​លោកឧត្ដមសេនីយ៍ត្រី​ ហេង​ ប៊ុនទី​ មេបញ្ជាការអាវុធហត្ថខេត្ត​ បានចុះឃាត់ខ្លួន​បុរសជនជាតិចិន​រូបនេះ និងដកហូតរថយន្ត​ ស្លាកលេខ​ ខម​ ដែល​ នៅចំណុចហាង​ ខារ៉ាអូខេ​ សៀងហៃ​ ក្រុងព្រះសីហនុ​ ខេត្ត​ព្រះសីហនុ​ ។​

បុរសចិនខាងលើនេះ មាន​ ឈ្មោះ ចាង ជិង សឹន ភេទ ប្រុស អាយុ ៤២ឆ្នាំ ជនជាតិ ចិនទើប​មកពីម៉ាកាវ​ ហើយ​មានមិត្តភក្តិបើកឡានមកទទួល​ ដែល​នៅក្នុងឡាននោះ​ មាន​ ឯសណ្ឋានកងយោធពលខេមរៈភូមិន្ទ​ មានស័ក្តិឧត្ដមសេនីយ៍ព្យួរក្នុងឡាន​ ខ្លួនក៏យកពាក់ថតលេង​ មិននឹកស្មានថាគេបង្ហោះពេញ​ Facebook ដូច្នេះទេ​ ។​

ពេលនេះបុរសជនជាតិមកពីម៉ាកាវរូបនេះកំពុងសាកសួរនៅបញ្ជាការដ្ឋានកងរាជអាវុធហត្ថខេត្តព្រះសីហនុ​ ដើម្បីចាត់ការបន្ត​​ ដោយឡែករថយន្ត​ និង​ ម្ចាស់រថយន្តដែលជាមន្ត្រីយោធានោះ​ កំពុងត្រូវបានថ្នាក់ដឹកនាំក្នុងស្ថាប័នកងទ័ពមាន​វិធានការណ៍ហើយ​ ។

បើតាមផ្លូវច្បាប់​ បុរសចិនរូបនេះត្រូវប្រឈមមុខចំពោះបទល្មើស២មាត្រា​ គឺ​ មាត្រា​ ៦១៥​ និង​ មាត្រា​ ៦១៦​ ។​

មាត្រា​ ៦១៥​ បទប្រើប្រាស់ដោយគ្មានសិទ្ធិនូវយានយន្តដែលមានសញ្ញាសម្គាល់ប្រើប្រាស់ដោយនគរបាល​ ឬ​ យោធា​ ត្រូវផ្ដន្ទាទោសដាក់ពន្ធនាគារពី១ខែ​ ទៅ​ ១ឆ្នាំ​ និង​ ពិន័យជាប្រាក់ពី​ ១សែនរៀល​ ទៅ​ ២លានរៀល​ ។

មាត្រា​ ៦១៦​ បទប្រើប្រាស់នូវឯកសណ្ឋានជាអាទ៍ដែលមានភាពប្រហាក់ប្រហែលគ្នានឹងនគរបាល​ ឬ​ យោធា​ ត្រូវផ្ដន្ទាទោសដាក់​ពន្ធនាគារ​ពី​ ១​ ខែ​ ទៅ​ ៦​ ខែ​ និង​ពិន័យជាប្រាក់ពី​ ១​សែនរៀល​ ទៅ​ ២​លានរៀល​ អំពើប្រើប្រាស់ជាសាធារណៈដោយគ្មានសិទ្ធិនូវសំលៀកបំពាក់​ ឯកសណ្ឋាន​ អត្តសញ្ញាណប័ណ្ណ​ សញ្ញាសំគាល់​ ឬ​ យានយន្ត​នគរបាល​ ឬ​ យោធា​ មានភាពប្រហាក់ប្រហែលគ្នានឹងសំលៀកបំពាក់​ ឯកសណ្ឋាន​ អត្តសញ្ញាណប័ណ្ណ​ សញ្ញាសំគាល់​ ឬ​ យានយន្ត​របស់នគរបាល​ ឬ​ យោធា​ ដែលអាចនាំអោយមានការភ័ន្តច្រលំ​ក្នុងស្មារតីនៃសាធារណជន​ ។
 

@Amapapa.News

Feature Ads