ព្រះសីហនុៈ បុរសម្នាក់ត្រូវមានវិប្បដិសារីមួយជីវិត ក្រោយពីដឹកប្រពន្ធរេចង្កូតទៅចិញ្ចើមផ្លូវ ហើយធ្លាក់ប្រពន្ធពីលើម៉ូតូត្រូវរថយន្តកិនស្លាប់ កាលពីវេលាម៉ោង១រសៀល ថ្ងៃទី២១ ខែមិថុនា ឆ្នាំ២០១៨ នៅលើផ្លូវជាតិលេខ៤ ចន្លោះគីឡូម៉ែត្រ១៩៣-១៩៤ ស្ថិតក្នុងភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។
ប្រភពព័ត៌មានបានឲ្យដឹងថា កាលពីវេលាកើតហេតុខាងលើ គេឃើញម៉ូតូ១គ្រឿង ម៉ាក YAMAHA ពណ៌ខៀវលាយស ពាក់ស្លាកលេខ ភ្នំពេញ 1BD-3779 បើកបរដោយឈ្មោះ អ៊ុង សាវង់ ភេទប្រុស អាយុ៣៨ឆ្នាំ មុខរបរកម្មករសំណង់ មានទីលំនៅភូមិរលួស ឃុំបឹងទូក ស្រុកទឹកឈូ ខេត្តកំពត ដឹកប្រពន្ធឈ្មោះ ភាព អាយុ៤១ឆ្នាំ មុខរបរកម្មករសំណង់ មានទីលំនៅជាមួយគ្នា ធ្វើដំណើរពីខេត្តព្រះសីហនុឆ្ពោះទៅរាជធានីភ្នំពេញ។ លុះមកដល់ចំណុចខាងលើ ម៉ូតូក៏បានរេចង្កូតចូលទៅជាយផ្លូវធ្វើឲ្យស្រ្តីជាប្រពន្ធធ្លាក់ពីលើម៉ូតូ ស្របពេលនោះ ស្រាប់តែមានរថយន្តមិនស្គាល់ម៉ាក១គ្រឿងមកដល់ពីក្រោយជាន់ហ្វ្រាំងមិនទាន់ ជ្រុលកិនបែកក្បាលធ្លាយខួរស្លាប់មួយរំពេច។ ចំណែករថយន្តបង្ក ក្រោយឃើញដូចនេះ ក៏បានបន្ថែមល្បឿនជិះរត់គេចបាត់ស្រមោល។