ភ្នំពេញៈ ជនជាតិចិនប្រុសស្រី៣នាក់ បានរងរបួសយ៉ាងដំណំ បន្ទាប់ពីបើករថយន្តទាំងងងុយដេក ក៏រេចង្កូតទៅបុកខឿនចិញ្ចើមផ្លូវ និងដើមគ្រាប់បែកខូចខាតរថយន្តមួយកំណាត់មុខ នៅខាងមុនមន្ទីរពេទ្យគន្ធាបុប្ផាក្រោយព្រះបរមរាជវាំង។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៥និង២៥នាទីព្រឹកថ្ងៃអង្គារ៍ ៧កើត ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៩ ខែមិថុនា ឆ្នាំ២០១៨ ចំណុចខាងនមន្ទីរពេទ្យគន្ធាបុប្ផា ក្រោយព្រះបរមរាជវាំង តាមបណ្ដោយផ្លូវលេខ២៤០ ក្នុងសង្កាត់បឹងរាំង ខណ្ឌដូនពេញ។
ប្រភពព័ត៌មានពីនគរបាលចរាចរណ៍ខណ្ឌដូនពេញ បានប្រាប់ឲ្យដឹងថា មុនពេលកើតហេតុ គឺមានស្ត្រីម្នាក់ជាជនជាតិចិន បានបើករថយន្តមួយគ្រឿងម៉ាកហ៊ីយ៉ានដាយស្តារិច ពណ៌ទឹកប្រាក់ ពាក់ស្លាកលេខ ភ្នំពេញ ២AR-៦៥០១ រួមដំណើជាមួយជនជាតិចិនប្រុសស្រី២នាក់ ផ្សេងទៀត ដោយបើកបរតាមបណ្ដោយផ្លូវលេច២៤០ ក្នុងល្បឿនយ៉ាងលឿន មិនដឹងជាមានរឿងអី ក៏រេចង្កូតទៅបុកឡើងខឿនចិញ្ចើមផ្លូវ រួចក៏ហោះទៅបុកដើមគ្រាប់បែកពេញទំហឹងទៅមុខលែងរួច ចំណែករថយន្តខូចខាតមួយកំណាត់មុខចំហៀងឆ្វេង និងអ្នកបើកបរត្រូវដឹកយកទៅព្យាបាលនៅមន្ទីរពេទ្យពន្លឺភ្លាមៗតែម្តង។
ក្រោយកើតហេតុនគរបាលបាលជំនាញចរាចរណ៍ខណ្ឌដូនពេញ បានចុះមកដល់កន្លែង និង ទំនាក់ទំនងទៅនគរបាលបាលជំនាញចរាចរណ៍ក្រុងចុះមកវាស់វែងយកទៅរក្សារទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ រង់ចាំឲ្យម្ចាស់ចូលខ្លួនមកដោះស្រាយ៕
