Wednesday, June 27, 2018

Update ៖ រថយន្តក្រុង “សូរិយា” ដឹកគ្រឿងញៀនជាង១០០គីឡូ និងជនសង្ស័យ៦នាក់ ត្រូវបានបញ្ជូនដល់ខេត្តទាំងយប់

អាម៉ាប៉ាប៉ាញ៉ូស

ស្ទឹងត្រែងៈ រថយន្តក្រុងដឹកអ្នកដំណើររបស់ក្រុមហ៊ុន “សូរិយា” ដែលដឹកនាំចូលគ្រឿងញៀនជាង១០០គីឡូក្រាម និងជនសង្ស័យ៦នាក់ ត្រូវបានសមត្ថកិច្ចជំនាញ នាំខ្លួនទៅដល់ស្នងការដ្ឋាននគរបាលខេត្តស្ទឹងត្រែងទាំងយប់តែម្ដង។ សមត្ថកិច្ចបញ្ជាក់ថា នៅព្រឹកថ្ងៃពុធនេះ នឹងមានការធ្វើសន្និសីទកាសែត បង្ហាញលទ្ធផលនៃប្រតិបត្តិការបង្ក្រាបបទល្មើសគ្រឿងញៀនឆ្លងដែនកម្ពុជា-ឡាវនេះ។

លោក លឹម ខេមរិន្ទ ភ្នាក់ងារអង្គភាពសារព័ត៌មាន Cam Post ប្រចាំខេត្តស្ទឹងត្រែង រាយការណ៍ឲ្យដឹងថា ជនសង្ស័យចំនួន៦នាក់ ដែលពាក់ព័ន្ធករណីគ្រឿងញៀនជាង១០០កញ្ចប់ធំៗ ដែលត្រូវកម្លាំងសមត្ថកិច្ចបង្ក្រាបបាននៅចំណុចច្រកទ្វារអន្តរជាតិត្រពាំងក្រៀល ព្រំដែនកម្ពុជា-ឡាវ កាលពីរសៀលថ្ងៃអង្គារនោះ ត្រូវបាននាំខ្លួនដល់ស្នងការដ្ឋាននគរបាលខេត្តទាំងយប់។

សមត្ថកិច្ចបញ្ជាក់ប្រាប់លោក លឹម ខេមរិន្ទ ថា ជនសង្ស័យទាំង៦នាក់ រួមមាន ទី១-ឈ្មោះ ឈៀវ ធារ៉ូ ភេទប្រុស អាយុ៣៥ឆ្នាំ​, ទី២-ឈ្មោះ ហែម សាវ៉ន ភេទប្រុស អាយុ៣៥ឆ្នាំ, ទី៣-ធៀវ តុងហៃ ភេទប្រុស អាយុ៣៧ឆ្នាំ​, ទី៤-​ឈ្មោះ ញឹម សុខ​ជា ភេទ​ប្រុស អាយុ​៣៧​ឆ្នាំ​, ទី៥-​ឈ្មោះ សៅ ប្រុស ភេទ​ប្រុស អាយុ​៣៨​ឆ្នាំ និងទី៦-​ឈ្មោះ ស បុ​ប្ជា ភេទ​ប្រុស អាយុ​៥៨​ឆ្នាំ​។ ជនសង្ស័យទាំង៣នាក់ចុងក្រោយនេះ ជាអ្នក​បើកបររថយន្តក្រុង ព្រូរថយន្ត និងអ្នកបកប្រែ ដែលសមត្ថកិច្ចឃាត់បានដំបូងគេបង្អស់។

ចំណែកវត្ថុតាង ដែលដកហូតពីក្នុងប្រតិបត្តិការបង្ក្រាបបទល្មើសគ្រឿងញៀនឆ្លងដែនខាងលើនេះ មានចំនួន១២០កញ្ចប់ធំ ជាប្រភេទម៉ាទឹកកក អ៊ិចស្ដាហ្ស៊ី ដែលមានទម្ងន់១២០គីឡូក្រាម ក៏ត្រូវបានបញ្ជូនមកដល់ស្នងការដ្ឋាននគរបាលខេត្តស្ទឹងត្រែង ទាំងយប់ផងដែរ ដើម្បីចាត់ការតាមនីតិវិធីច្បាប់។

គួរបញ្ជាក់ថា គ្រឿងញៀនប្រមាណជាង១០០ដុំ មាន​ទម្ងន់​ជាង១០០​គីឡូក្រាម ត្រូវបានកម្លាំងនគរបាល​ប្រឆាំងគ្រឿងញៀន​ នៃក្រសួងមហាផ្ទៃ ធ្វើការបង្ក្រាប​បាន ​កាលពីរសៀល​ថ្ងៃ​ទី២៦ ខែមិថុនា ឆ្នាំ២០១៨ នៅចំណុចច្រក​ទ្វារអន្តរជាតិត្រពាំង​គ្រៀល​ ព្រំដែន​កម្ពុជា​-​ឡាវ ខណៈ​ក្រុម​ឈ្មួញ​ដឹក​ចេញពី​ប្រទេស​ឡាវ ​ចូល​មកក្នុងប្រទេស​កម្ពុជា។

បើតាមមន្រ្តីច្រកទ្វារ​អន្តរជាតិ​ត្រពាំង​គ្រៀល ​ក្រុង​ស្ទឹង​ត្រែង ឲ្យ​​ដឹងថា ថ្នាំ​ញៀនទាំងនេះ មាន​ចំនួន​១២០​ដុំ ជាប្រភេទម៉ាកទឹកកក ដែលក្នុងមួយ​ដុំមានទម្ងន់​ប្រហែលជា​១​គីឡូ​ក្រាម​ ត្រូវ​បាន​​រក​ឃើញ​លើ​រថយន្តក្រុង​ដឹក​អ្នកដំណើររបស់ក្រុមហ៊ុន «ភ្នំពេញ សូ​រិ​យា» ម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3C-2671 ខណៈ​កំពុងធ្វើដំណើរចេញពីច្រកទ្វារអន្តរជាតិ និង​បន្ត​គោលដៅ​ទៅ​រាជធានី​ភ្នំពេញ​។

ប្រភពដដែលបន្ត​ថា ថ្នាំ​ញៀន​​ដ៏​​ច្រើននេះ ​ត្រូវ​បាន​នាំ​ចេញពី​ប្រទេស​ឡាវ កាលពី​វេលា​ម៉ោង​ជាង​៣​រសៀល​ ថ្ងៃ​ទី​២៦​​ ខែមិថុនា​ ឆ្នាំ២០១៨​។ ក្នុងការ​ឆែកឆេរ​ក​ឃើញ​ថ្នាំ​ញៀននេះ សមត្ថកិច្ច​បាន​ឃាត់​បុរស៣​នាក់​ ដែល​មានការ​ពាក់ព័ន្ធ​ រួមមានទី​១ គឺ​អ្នកបើកបររថយន្ត​ ទី​២​អ្នក​បក​ប្រែភាសា និង​ទី​៣​ ជន​សង្ស័យ​ជា​ម្ចាស់​ថ្នាំ​ញៀនតែម្តង៕

@Amapapa.News

Feature Ads