ភ្នំពេញៈ ចូលដល់រដូវកាលបាល់ទាត់ពិភពលោក ឬជាភាសាអង់គ្លេសហៅថា World Cup បានធ្វើឲ្យបទល្មើស លួច ឆក់ ប្លន់ កាន់តែកក្រើកឡើងឥតល្ហែនៅរាជធានីភ្នំពេញ ទាំងយប់ទាំងថ្ងៃ។ ជាក់ស្ដែង នារីជាអ្នកបម្រើការខារ៉ាអូខេម្នាក់ ត្រូវបានក្រុមចោរធ្វើសកម្មភាពឆក់កាបូបស្ពាយបានសម្រេច រួចជិះរត់គេចខ្លួនបាត់ស្រមោល ខណៈពេលកំពុងដើរចេញពីធ្វើការបំណងទៅផ្ទះមិត្តភក្តិ។
ហេតុការណ៍ឆក់ចោរនេះ កើតឡើងកាលពីវេលាម៉ោង២៖២០នាទីរំលងអធ្រាត្រ ឈានចូលថ្ងៃទី២៩ ខែមិថុនា ឆ្នាំ២០១៨នេះ ត្រង់ចំណុចខាងក្រោយអតីតខារ៉ាអូខេ ញ៉ូស្តារ តាមបណ្តោយផ្លូវលំបេតុង១០B ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
នារីរងគ្រោះ ដែលសុំមិនបញ្ចេញឈ្មោះ ប្រាប់ថា ខ្លួនមានអាយុ២១ឆ្នាំ ជាបុគ្គលិកបម្រើការនៅខារ៉ាអូខេ ញ៉ូស្តារ ស្នាក់នៅសង្កាត់ផ្សារដើមគរ ខណ្ឌទួលគោក មានស្រុកកំណើតនៅឯខេត្តសៀមរាប។
នារីរងគ្រោះរៀបរាប់ឲ្យភ្នាក់ងារ CAM POST ដឹងថា នៅមុនពេលកើតហេតុ គាត់បានធ្វើដំណើរថ្មើរជើងតែម្នាក់ឯង តាមបណ្តោយផ្លូវ១០B ក្នុងទិសដៅពីកើតទៅលិច ដែលទើបតែចេញមកពីកន្លែងធ្វើការបំណងដើរទៅផ្ទះរបស់មិត្តភ័ក្ត ដែលនៅក្បែរកន្លែងកើតហេតុ។ លុះមកដល់ចំណុចកើតហេតុ ក៏ស្រាប់តែលេចមុខក្រុមជនសង្ស័យចំនួនពីរនាក់ ជិះម៉ូតូមួយគ្រឿងម៉ាក ហុងដាឌ្រីម ពណ៌ខ្មៅ មិនចាំស្លាកលេខ មកពីក្រោយ រួចបានធ្វើសកម្មភាពឆក់កាបូបស្ពាយពីនាង ដែលស្ពាយនៅនឹងស្មារបានសម្រេច បណ្តាលឲ្យនាងដួលរងរបួសរលាត់ដៃរលាត់ជើង។ បន្ទាប់ពីធ្វើសកម្មភាពហើយ ក្រុមចោរបានបន្ថែមល្បឿន ជិះរត់គេចខ្លួនបាត់ស្រមោលដោយសុវត្ថិភាព។
នាងរងគ្រោះបញ្ជាក់ថា នៅក្នុងកាបូបរបស់នាង ដែលត្រូវក្រុមចោរឆក់យកទៅនោះ មានលុយចំនួន២៥០ដុល្លារ និងរបស់របរមួយចំនួនទៀត។
ក្រោយពេលកើតហេតុ ជនរងគ្រោះ ត្រូវបានមិត្តភ័ក្តដឹកតាមម៉ូតូកង់បីទៅផ្ទះ រង់ចាំព្រឹកនេះ បានទៅដាក់ពាក្យបណ្ដឹងជាក្រោយ៕