Thursday, July 26, 2018

កម្ពុជា​ ដាក់ផែនការទាក់ទាញភ្ញៀវទេសចរក្នុងស្រុកឲ្យបាន១៩លាននាក់ នៅឆ្នាំ២០២៥

ពិសី

ភ្នំពេញៈ ក្រសួងទេសចរណ៍​ បានដាក់ផែនការទាក់ទាញភ្ញៀវទេសចរក្នុងស្រុក​ឲ្យបាន១៩លាននាក់នៅឆ្នាំ២០២៥ខាងមុខ​ ដើម្បីបង្កើតការងារ​ និង​បង្កើនចំណូលចូលសេដ្ឋកិច្ចជាតិ។

កាលពីថ្មីៗនេះ​ លោក ថោង ខុន រដ្ឋមន្ត្រីក្រសួងទេសចរណ៍មានប្រសាសន៍​ថា ក្រសួងបានរៀបចំផែនការមានដូចជា ៖ ការពង្រឹង​ប្រព័ន្ធ​វាយតម្លៃ ចំណាត់ថ្នាក់សេវាស្នាក់នៅ ចលនាប្រឡងប្រណាំង “ទីក្រុងស្អាត” ចលនាប្រឡង ប្រណាំង រង្វាន់សម្តេច​​តេជោនាយករដ្ឋ​​មន្ត្រី​សម្រាប់​ធុរកិច្ចបៃតងក្នុងវិស័យទេសចរណ៍ ចលនាប្រឡង​ប្រណាំង “រមណីយដ្ឋានទេសចរណ៍គំរូ” ចលនាប្រឡងប្រណាំង “បដិសណ្ឋារកិច្ចល្អ” ជាដើម។

ជាពិសេស​ ក្រសួងទេសចរណ៍ បានសហ​ការជាមួយដៃគូឯក​​ជនបង្កើតឲ្យមានពិព័រណ៍ក្នុងស្រុកដើម្បីបង្ហាញផលិតផលទេសចរណ៍ ដែលប្រជាសហគមន៍ផលិតបាន ជាមួយនិងការដាក់តាំង​​បង្ហាញរួប​ភាព រម្មណីយដ្ឋានទេសចរទូទាំងប្រទេសផងដែរ។

ក្រៅពីនេះ ក្រសួងទេសចរណ៍ និងវិស័យឯកជនកំពុងសិក្សារៀបចំដាក់​ចេញគោលនយោបាយកម្មវិធី “កម្ពុជាមាតុភូមិខ្ញុំ” ក្រោមពាក្យស្លោក “ទាំងអស់គ្នាអាចធ្វើដំណើរកម្សាន្តបាន” និងបង្កើតកម្មវិធីប័ណ្ណដំណើរ​កំសាន្តដែលមានកញ្ជប់ទស្សនកិច្ចក្នុងស្រុក ដែលមានតំលៃសមរម្យ ដើម្បីលើកទឹកចិត្តដល់សិស្ស និស្សិត សាស្រ្តចារ្យ មន្ត្រីរាជការ កម្មករ និងកីឡាករ អាចធ្វើដំណើរកម្សាន្តឱ្យបានយ៉ាងហោចណាស់១ដងក្នុង១ឆ្នាំ។

គួរបញ្ជាក់ថា កាលពីឆ្នាំ២០១៧ កន្លងមកនេះ ប្រជាពលរដ្ឋកម្ពុជា​​ប្រមាណជិត១១លាននាក់បានធ្វើដំណើរកំសាន្តនៅ​តាមរមណីយ​ដ្ឋានទេសចរណ៍នានាទូទាំងប្រទេស៕

@Amapapa.News

Feature Ads