សៀមរាប៖ នៅសៀមរាប-អង្គរ កាលពីរាត្រីថ្ងៃទី៣០ ខែមិថុនា ឆ្នាំ២០១៨ កន្លងទៅនេះ ជាការអបអរសាទរខួបអនុស្សាវរីយ៍លើកទី៦០ នៃទំនាក់ទំនងកាទូតរវាងកម្ពុជា-ចិន ប្រតិភូបេសកជន និងប្រតិបត្តិករទេសចរណ៍ចិនរាប់ពាន់នាក់ ជាមួយរាជរដ្ឋាភិបាលកម្ពុជា ក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ និងជាតំណាងរបស់សម្តេចតេជោនាយករដ្ឋមន្ត្រី ដែលរៀបចំឡើងដោយក្រសួងទេសចរណ៍កម្ពុជា សហការជាមួយក្រសួងវប្បធម៌ និងទេសចរណ៍ចិន ។
លោករដ្ឋមន្ត្រី ថោង ខុន បានបញ្ជាក់ថា ក្នុងឱកាសព្រឹត្តការណ៍ជាប្រវត្តិសាស្រ្តនេះ គឺជាជំហានមួយដ៏មានសារសំខាន់ ដែលមិនត្រឹមតែរួមចំណែកក្នុងការលើកកម្ពស់ទំនាក់ទំនងរវាងប្រទេស និងប្រទេស និងរវាងប្រជាជនជាមួយប្រជាជនទាំងពីរឱ្យកាន់តែប្រសើរឡើងប៉ុណ្ណោះទេ ប៉ុន្តែថែមទាំងមាននាទីដ៏សំខាន់ក្នុងការនាំសារសន្តិភាព មិត្តភាព ការអភិវឌ្ឍ និងកិច្ចសហប្រតិបត្តិការឱ្យកាន់តែប្រសើរឡើង និងលោកបានបន្ថែមថា អនាគតនៃទេសចរណ៍កម្ពុជា គឺមិនអាចកាត់ផ្តាច់ចេញពីការស្រូបទាញកំណើននៃលំហូរទេសចរចិន និងអ្នកវិនិយោគចិនបានឡើយ ហើយកម្ពុជាគាំទ្រជានិច្ចនូវគោលនយោបាយចិនមួយ និងយុទ្ធសាស្រ្តខ្សែក្រវាត់មួយវិថីមួយ ដែលជាក្របខណ្ឌនយោបាយឈ្នះ-ឈ្នះរបស់រដ្ឋាភិបាលចិន គ្របដណ្តប់លើកិច្ចសហប្រតិបត្តិការសេដ្ឋកិច្ចផ្លូវសូត្រ និងកិច្ចសហប្រតិបត្តិការផ្លូវសូត្រសមុទ្រសតវត្សទី២១ ។
ជាមួយគ្នានេះដែរ លោកក៍បានសង្កត់ធ្ងន់ថា បើតាមការព្យាករណ៍របស់អង្គការទេសចរណ៍ពិភពលោក (UNWTO) បានគូសបញ្ជាក់ថា នៅឆ្នាំ២០២០ ខាងមុខនេះ ចំនួនទេសចរចិនធ្វើដំណើរចេញក្រៅប្រទេសខ្លួន មានប្រមាណ ២០០លាននាក់ ឬអាចច្រើនជាងនេះ ។
ហើយចំពោះការចំណាយវិញគឺប្រមាណ ៤២០ពាន់លានដុល្លារ ដែលធ្វើឲ្យបណ្តាប្រទេសនានា នៅលើពិភពលោកនឹងត្រៀមខ្លួនក្នុងការទាក់ទាញ និងទទួលស្វាគមន៍ទេសចរចិន ដើម្បីជាចំណូលសម្រាប់ប្រទេសជាតិ។
នៅឆ្នាំ២០១៨ នេះ កម្ពុជានឹងទទួលបានទេសចរអន្តរជាតិប្រមាណ ៦.២លាននាក់
នៅឆ្នាំ២០២០ ប្រមាណ ៧លាននាក់
និងនៅឆ្នាំ២០៣០ កម្ពុជានឹងទទួលបានទេសចរអន្តជាតិប្រមាណ ១៥លាននាក់ ដែលនាំមកនូវចំណូលសរុបប្រមាណ ១០,០០០លានដុល្លារ និងបង្កើតនូវឱកាសការងារប្រមាណ ២លាននាក់សម្រាប់ប្រជាជាតិ។
សូមជម្រាបជូនថា ឆ្នាំ២០១៧ កន្លងមក កម្ពុជាបានទទួលភ្ញៀវទេសចរអន្តរជាតិចំនួន ៥.៦លាននាក់ កើនឡើង ១១.៨% ក្នុងនោះមានភ្ញៀវទេសចរចិនចំនួន ១,២១០,៧៨២នាក់ កើនឡើង ៤៥.៩% ឈរក្នុងលំដាប់ថ្នាក់លេខ១ នៃទីផ្សារទេសចរណ៍សំខាន់ៗទាំង១០ និងបាននាំមកនូវប្រាក់ចំណូលប្រមាណ ៣,៦៣៨លានដុល្លារ ចាក់បញ្ចូលក្នុងសេដ្ឋកិច្ចជាតិ រួមចំណែក ១៣% នៃផលិតផលក្នុងស្រុកសរុប (GDP)។ សម្រាប់រយៈពេល៤ខែដើមឆ្នាំ២០១៨ កម្ពុជាទទួលបានភ្ញៀវទេសចរចិនចំនួន ៦៤៧,៣៥២នាក់ កើនឡើង ៧៩.៤% នឹងបន្តឈរក្នុងលំដាប់ថ្នាក់លេខ១ នៃទីផ្សារទេសចរណ៍សំខាន់ៗទាំង១០របស់កម្ពុជា។