កោះកុងៈ បុរសម្នាក់ត្រូវខ្សែភ្លើងឆក់ស្លាប់ បង្កការភ្ញាក់ផ្អើលកាលពីវេលាម៉ោង២ និង៥៥នាទីរសៀល ថ្ងៃពុធ ទី៤ ខែកក្កដា ឆ្នាំ២០១៨ នៅចំណុចភូមិបឹងព្រាវ ឃុំបឹងព្រាវ ស្រុកស្រែអំបិល ខេត្តកោះកុង។
ជនរងគ្រោះឈ្មោះ ដឹក ឌឹម ភេទប្រុស អាយុ៣១ឆ្នាំ មានទីលំនៅភូមិសាលាម្នាង ឃុំបឹងព្រាវ ស្រុកស្រែអំបិល ខេត្តកោះកុង។
ប្រភពព័ត៌មានបានឲ្យដឹងថា មុនពេលកើតហេតុ ជនរងគ្រោះបានឡើងទៅជួសជុលដំបូងផ្ទះខណៈមេឃកំពុងភ្លៀង។ ស្របពេលនោះ ជនរងគ្រោះក៏បានទៅប៉ះចំខ្សែភ្លើងដែលគងនៅលើដំបូលផ្ទះអ្នកជិតខាង បណ្តាលឲ្យឆក់ស្លាប់តែម្តង។
ក្រោយពេលកើតហេតុ សមត្ថកិច្ចបានចុះទៅត្រួតពិនិត្យ និងធ្វើកោសល្យវិច័យ ហើយបានប្រាប់ថា ជនរងគ្រោះពិតជាស្លាប់ដោយសារត្រូវខ្សែភ្លើងឆក់ពិតប្រាកដមែន រួចប្រគល់សាកសពឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី៕