សម្ដេចនាយករដ្ឋមន្ត្រី ហ៊ុន សែន និងឯកឧត្តម ប្រាយុទ្ធ ចន្ទអូចា នាយករដ្ឋមន្ត្រីថៃ នឹងជិះរថភ្លើងរួមគ្នា ដើម្បីពិនិត្យមើលខ្សែរថភ្លើងរវាងប្រទេសទាំងពីរ។ យោងតាមប្រសាសន៍ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន។
នៅថ្ងៃទី៤ ខែកក្កដា ឆ្នាំ២០១៨ ក្រសួងសាធារណការនិងដឹកជញ្ជូន បានដាក់ឱ្យដំណើរការបណ្ដោះអាសន្ននូវសេវា ដឹកជញ្ជូនអ្នកដំណើរតាមរថភ្លើងពីខេត្តពោធិ៍សាត់ ទៅរាជធានីភ្នំពេញ ដែលមានប្រវែងសរុប១៦៦គីឡូម៉ែត្រ។ ផ្លូវរថភ្លើងពីពោធិ៍សាត់នេះត្រូវភ្ជាប់ស្ថានីយខេត្តបាត់ដឹង ខេត្តកំពង់ស្ពឺ ទើបមកភ្ជាប់នឹងរាជធានីភ្នំពេញ។ ខ្សែរថភ្លើងនេះនឹងត្រូវតភ្ជាប់ជុំវិញប្រទេសក្នុងតំបន់អាស៊ានផងដែរ។
ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន នឹងជួបជាមួយភាគីថៃ នៅថ្ងៃទី០៦ ខែកក្កដា ដើម្បីពិភាក្សាពីដំណើរការតភ្ជាប់ និងការដឹកជញ្ជូនអ្នកដំណើរ រួមទាំងទំនិញដែលត្រូវឆ្លងកាត់ផ្ទាល់រវាងប្រទេសទាំងពីរ ក្រោយមានការឯកភាពគ្នា នាយករដ្ឋមន្ត្រី នៃព្រះរាជាណាចក្រកម្ពុជា និងនាយករដ្ឋមន្ត្រីព្រះរាជាណាចក្រថៃ នឹងជិះរថភ្លើងរួមគ្នាដើម្បីពិនិត្យមើលខ្សែរថភ្លើងរវាងប្រទេសទាំងពីរ។
ខ្សែរថភ្លើងនេះគឺរត់ពីរាជធានីភ្នំពេញ រហូតដល់ស្ថានីយរថភ្លើងប៉ោយប៉ែត ខេត្តបន្ទាយមានជ័យ ជាប់ព្រំដែនប្រទេសថៃ ហើយខ្សែរថភ្លើងនេះ នឹងភ្ជាប់ជាមួយខ្សែរថភ្លើងប្រទេសថៃ ហើយបន្តរហូតដល់ប្រទេសសិង្ហបុរី នាពេលខាងមុខ។
សូមបញ្ជាក់ថា ការស្តារឡើងវិញកំណាត់ផ្លូវដែកពីភ្នំពេញ រហូតដល់ក្រុងប៉ោយប៉ែត ខេត្តបន្ទាយមានជ័យនេះ រដ្ឋាភិបាលកម្ពុជាត្រូវចំណាយថវិកាប្រមាណ ៩៦.៦លានដុល្លារអាមេរិក ក្នុងនោះទឹកប្រាក់ប្រមាណ ១៣លានដុល្លារជារបស់ធនាគារអភិវឌ្ឍន៍អាស៊ី (ADB) ហើយទឹកប្រាក់ ៨៣.៦លានដុល្លារ ជាថវិការបស់រាជរដ្ឋាភិបាល។