Wednesday, July 18, 2018

ថៅកែភាស៊ីផ្សារស្រុកស្អាង ជាយោធា និងជាជំនួយការមន្ត្រីជាន់ខ្ពស់ផង ទើបហ៊ានផ្គើនដើរទារលុយតាមកញ្ច្រែង-ល្អី

ពិសី

កណ្តាលៈ​ បើតាមការអោយដឹងពីលោកមេឃុំត្រើយស្លា មកថា ក្រុមការងារគណៈពង្រឹងឃុំត្រើយស្លាបានកោះហៅថៅកែភាស៊ីផ្សារក្នុងស្រុកស្អាង បន្ទាប់ពីដឹងទៅលើសកម្មភាពរបស់ លោក ប៉ោ​ សេង​ នៅតែដាក់កូនចៅយកលុយពីបងប្អូនអាជីវករដែលលក់តាមកញ្ច្រែង,ល្អី​ ផ្គើនទៅនិងសារាចរណ៍របស់សម្តេចតេជោ​ រួចមកនោះ។

លោក ប៉ោ​ សេង ជាថៅកែភាស៊ីផ្សារ ស្រុកស្អាង ដែលបានសិទ្ធវិនិយោគរហូតទៅដល់៣៧ឆ្នាំ។

លោក ប៉ោ​ ប៉េង​ មេឃុំត្រើយស្លា​ បានអោយដឹងថាក្រុមការងារគណ:ពង្រឹងឃុំត្រើយស្លាបានហៅថៅកែភាស៊ីផ្សារក្នុងស្រុកស្អាងមកពិភាក្សាគ្នាតែរូបលោកមិនបានចូលរួមទេ​ លោកគ្រាន់តែដឹងតាមក្រុមការងារថាចាប់ពីថ្ងៃទី១៧​ ខែកក្តដា​ ឆ្នាំ២០១៨​ នេះតទៅខាងភាគីលោកប៉ោ​ សេង​ ព្រមបញ្ឈប់យកភាស៊ីពីបងប្អូនអាជីវករដែលលក់តាមកញ្ច្រែង,ល្អី​ ទៀតហើយ។

​ការដែលលោកប៉ោ​ សេង​ ផ្គើនទៅនិងសារាចរណ៍របស់សម្តេចតេជោ រហូតមកដល់ពេលនេះបាន គឺដោយសារតែអាជ្ញាធរក៏ដូចជាជំនាញពាក់ព័ន្ធ ហាក់ដូចជាខ្លាចអំណាចថៅកែផ្សាររូបនោះ ព្រោះលោកប៉ោ​ សេង​ ជាយោធាស័ក្តិ៤កន្លះផងនិងជាជំនួយការមន្ត្រីជាន់ខ្ពស់មានឋាន:ស្មើរដ្ឋលេខាធិការទៀតផង។

ប្រភពពីមន្ត្រីក្រសួងសេដ្ឋកិច្ចហិរិញ្ញវត្ថុម្នាក់បានអោយដឹង ក្នុងល័ក្ខណ្ឌសុំមិនបញ្ចេញឈ្មោះ បានទំលាយថាការដែលលោកប៉ោ​ សេង​ បានសិទ្ធវិនិយោគផ្សារក្នុងស្រុកស្អាងរហូតដល់ទៅ៣៧ឆ្នាំ ដោយសារតែមានការឃុបឃិតគ្នានិងដោយមានការសម្របសម្រួលពីលោកជា​ គឹមតុង​ អនុប្រធានទ្រព្យសម្បត្តិរដ្ឋដែលបានលួចបង្កប់ភាគហ៊ុន ជាមួយ លោក ប៉ោ សេង​ មិនថាតែផ្សារនៅក្នុងស្រុកស្អាងនេះទេ សូម្បីតែផ្សារនៅទីរួមខេត្តមណ្ឌលគីរីក៏លោក ជា​ គឹមតុង មានភាគហ៊ុនជាមួយលោកប៉ោ​ សេងផងដែរ។

​កន្លងមកប្រជាពលរដ្ឋ នៅក្នុងភូមិគោកអណ្តែក ឃុំស្អាងភ្នំ ស្រុកស្អាង ខេត្តកណ្តាល បានផ្ទុះការតវ៉ា និងសំណូមពរឲ្យអាជ្ញាធរ ក៏ដូចជាគណៈពង្រឹងឃុំស្អាងភ្នំ មានវិធានការ ទប់ស្កាត់ចំពោះ ទីតាំង ចាក់សំរាមរបស់ លោកស័ក្តិ៤កន្លះ ប៉ោ សេង ដែល ជះក្លិនស្អេះ ស្អុយ ស្អាប ដោយភក់ជ្រាំ និងដង្កូវពាសវាលពាសកាល ប៉ះពាល់សុខភាព របស់ពួកគាត់យ៉ាងធ្ងន់ធ្ងរតែអាជ្ញាធរហាក់ពុំសូវហ៊ានចាត់ការឡើយហើយគេសង្កេតឃើញលោកប៉ោ​ សេង​ ពូកែអែបអបចៅហ្វាយស្រុកស្អាងយ៉ាងត្រជាក់ល្ហឹប។

​ការវិនិយោគផ្សារក្នុងស្រុកស្អាងរហូតដល់៣៧ឆ្នាំនេះដែរខាងក្រុមអាជីវករលក់ដូរនៅផ្សារស្អាងខាងត្បូងក្តៅក្រហាយទៅនិងថៅកែផ្សារគិតតែយកភាស៊ីនិងធ្វើតែស្តង់លក់ត្រី(យឿត្រី) នាំចូលពីយួនជាលក្ខណៈឯកជនរបស់ខ្លូនតែមិនគិតសាងសង់ផ្សារទុកអោយពួកគាត់លក់ហាលខ្យល់ហាលភ្លៀងទង្វើរបែបនេះគួណាស់តែខាងមន្ទីរជំនាញមានវិធានការ​សារជាថ្មីផង។

​ក្រុមអាជីវករលក់ដូរនៅផ្សារស្អាងខាងត្បូងក៏បានសំណូមពរដល់សម្តេចតេជោ​ ហ៊ុនសែន​ មេត្តាជួយសាងសង់ផ្សារស្អាងខាងក្បូងនេះផងព្រោះកន្លងមកថៅកែផ្សារជាច្រើននាក់មកហើយសាងសង់ផ្សារនេះមិនបានសម្រេចទេមានតែចេតនាបោករហូតមកដល់ថៅកែប៉ោសេងនេះមិនបានសាងសង់ផ្សារនេះទេមានតែមកលួចកាត់យកដែកនិងស័ង្កសីយកទៅសង់កន្លែងផ្សេងទៅវិញ។

ពាក់ព័ន្ធករណីខាងលើនេះ Campost មិនអាចទាក់ទងសុំការស្រាយបំភ្លឺ ពីលោក ប៉ោ សេង បាននៅឡើយទេ៕

@Amapapa.News

Feature Ads