រតនគិរីៈ កម្លាំងនគរបាលជំនាញការិយាល័យព្រហ្មទណ្ឌកម្រិតស្រាល សហការជាមួយកម្លាំងអធិការនគរបាលក្រុងបានលុង និងប៉ុស្តិ៍នគរបាលរដ្ឋបាលឡាបានសៀក ដឹកនាំសម្របសម្រួលដោយលោក រ៉ា បូរ៉ាន់ឌី ព្រះរាជអាជ្ញារង បានឃាត់ខ្លួនជនសង្ស័យម្នាក់ កាលពីវេលាម៉ោង៩ និង៤៥នាទីព្រឹក ថ្ងៃទី៣ ខែកក្កដា ឆ្នាំ២០១៨ ពាក់ព័ន្ធនឹងករណីចោរកម្ម (លួចបដិមាករ) ដែលប្រព្រឹត្តិទៅកាលពីថ្ងៃទី១៧ ខែមិនា ឆ្នាំ២០១៨ នៅចំណុចវត្តហាត់ប៉ក់។
ជនសង្ស័យដែលសមត្ថកិច្ចឃាត់ខ្លួនឈ្មោះ ឡៃ សុីវន្ថា ភេទប្រុស អាយុ៣៣ឆ្នាំ ជនជាតិខ្មែរ រស់នៅភូមិ៧មករា សង្កាត់ឡាបានសៀក ក្រុងបានលុង។
ជាមួយនឹងការឃាត់ខ្លួននេះដែរ សមត្ថកិច្ចបានឆែកឆេរនៅបន្ទប់របស់ជនសង្ស័យ និងដកហូតរូបព្រះប្រក់នាគក្បាល៧ ចំនួន១អង្គធំ, រូបព្រះ២អង្គតូច, គងស្ពាន់តូចធំ ចំនួន៨, ចង្ក្រងស្ពាន់ចំនួន៦, រូបក្របីស្ពាន់១, ឆ្នាំងស្ពាន់១, កូនជញ្ជីងស្ពាន់២, រូបមាន់ស្ពាន់៣, តុំដាក់កំបោរស្ពាន់២, ផ្ទិលស្ពាន់១, លោហធាតុប្រាក់២ផ្ទាំង, រូបព្រះថ្មកែវ១ និងម៉ូតូម៉ាកហុងដា MSX ផលិតនៅប្រទេសចិន ពណ៌ស ដែលជាមធ្យោបាយធ្វើសកម្មភាព១គ្រឿងផងដែរ។
បច្ចុប្បន្ន ជនសង្ស័យត្រូវបានសមត្ថកិច្ចឃុំខ្លួនបណ្តោះអាសន្ន ដើម្បីសាកសួរ និងកសាងសំណុំរឿង បញ្ជូនទៅតុលាការចាត់ការតាមនីតិវិធី៕
