តាកែវៈ ជនសង្ស័យម្នាក់ ដែលមានជំនាញខាងធ្វើសកម្មភាពឆក់កាបូបនៅតាមទីសាធារណៈ ត្រូវកម្លាំងសមត្ថកិច្ចខេត្តតាកែវ ចុះអន្តរាគមន៍គ្រប់ច្រកល្ហករហូតឃាត់ខ្លួនបាន បន្ទាប់ពីធ្វើសកម្មភាពឆក់កាបូបពីស្ត្រីពីរនាក់ ក្នុងថ្ងៃតែមួយ។
សមត្ថកិច្ចឲ្យដឹងថា ជនសង្ស័យរូបនេះ បានធ្វើសកម្មភាពឆក់កាបូបយួរដៃពីស្ត្រីឈ្មោះ អ៊ូច ពៅ អាយុ៤៣ឆ្នាំ រស់នៅឫស្សីជុំ ឃុំទ្រា ស្រុកសំរោង និងលួចយកប្រាក់ចំនួន ៥០.០០០៛(ប្រាំម៉ឺនរៀល) ក្នុងកាបូប នៅចំណុចភូមិឫស្សីជុំ ឃុំទ្រា ស្រុកសំរោងនៅចំណុចភូមិឫស្សីជុំ ឃុំទ្រា ស្រុកសំរោង កាលពីព្រឹកថ្ងៃសុក្រ ១កើត ខែទុតិយាសាឍ ឆ្នាំច សំរឹទ្ធិស័ក ពុទ្ធសករាជ២៥៦២ ត្រូវនឹងថ្ងៃទី១៣ ខែកក្កដា ឆ្នាំ២០១៨ រួចក៏ជិះម៉ូតូគេចខ្លួនបាត់។
លុះដល់វេលាម៉ោង១២៖៣០នាទី ថ្ងៃត្រង់ ថ្ងៃខែឆ្នាំដដែល ជនសង្ស័យដដែលនេះ បានធ្វើសកម្មភាពឆក់កាបូបម្ដងទៀត នៅចំណុចខាងកើតកោះព្នៅ ស្ថិតក្នុងភូមិសែនភាស ឃុំទ្រា ស្រុកសំរោង ដោយឆក់កាបូបយួរដៃរបស់ស្ត្រីរងគ្រោះឈ្មោះ ច្រិង ផល្លី អាយុ២៤ឆ្នាំ រស់នៅភូមិអង្គរ ឃុំព្រែកផ្ទោល ស្រុកអង្គរបូរី ដោយក្នុង កាបូបមានទូរស័ព្ទដៃ១គ្រឿង។
ក្រោយពីទទួលបានព័ត៌មានភ្លាម ឧត្តមសេនីយ៍ទោ សុខ សំណាង ស្នងការនគរបាលខេត្ត បានបញ្ជាកម្លាំងអធិការដ្ឋាននគរបាលស្រុកសំរោង សហការជាមួយកម្លាំងប៉ុស្តិ៍នគរបាលរដ្ឋបាលចំណុះអធិការដ្ឋាន បានចុះអន្តរាគមន៍ពួនស្ទាក់គ្រប់ច្រកល្ហក រហូតឈានដល់ឃាត់ខ្លួនជនសង្ស័យខាងលើនៅចំណុចផ្លូវលំ ស្ថិតក្នុងភូមិទួលទ្រា ឃុំលំចង់ ស្រុកសំរោង ខេត្តតាកែវ។
បើតាមសមត្ថកិច្ច ជនសង្ស័យរូបនេះ មានឈ្មោះ សុ គីម ភេទប្រុស អាយុ២៨ឆ្នាំ រស់នៅភូមិបឹងត្រាញ់ ឃុំបឹងត្រាញ់ខាងត្បូង ស្រុកសំរោង និងដកហូតបានម៉ូតូ១គ្រឿងម៉ាក ហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ភ្នំពេញ 1FP-0420 ដែលជនសង្ស័យជិះធ្វើសកម្មភាព។
បច្ចុប្បន្ន ជនសង្ស័យខាងលើ និងវត្ថុតាង ត្រូវបានកម្លាំងជំនាញកំពុងធ្វើការសាកសួរ និងឃាត់ខ្លួនបណ្ដោះអាសន្ននៅអធិការដ្ឋានស្រុកសំរោង ដើម្បីកសាងសំណុំរឿងចាត់ការតាមនីតិវិធី៕
