នៅព្រឹកថ្ងៃទី០១ ខែកក្កដា ឆ្នាំ២០១៨ នេះ ក្រមារបស់ប្រទេសកម្ពុជាបានបំបែកឯកត្តកម្មពិភពលោកជាក្រមាវែងជាងគេ ដែលទទួលស្គាល់ដោយស្ថាប័នកំណត់ត្រាពិភពលោក (Guinness World Record) ។ ថ្លែងនៅក្នុងឱកាសដ៏វិសេសវិសាលនេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជាដែលបានរៀបចំការត្បាញក្រមានេះ បានលើកឡើងថា៖ បើមានប្រទេសណាមួយចង់ត្បាញក្រមា លើសពី១១៤៩.៨ ម៉ែត្រ ប្រទេសនោះត្រូវសម្លឹងមើលកម្ពុជាជាមុនសិន ព្រោះកម្ពុជាជាប្រទេសទីមួយ ដែលបានត្បាញក្រមាវែងជាងគេ លើពិភពលោកមុនគេបង្អស់។
បេក្ខជនតំណាងរាស្រ្តមណ្ឌលកំពង់ស្ពឺរូបនេះ បានរៀបរាប់ថាការត្បាញក្រមាដែលមានប្រវែងជាងគេនៅលើពិភពលោកនេះ មានអ្នកចូលរួមត្បាញជាង៣០ម៉ឺននាក់ ដោយមកពីបណ្ដាស្ថាប័ននានា និងកងកម្លាំងប្រជាពលរដ្ឋ ព្រមទាំងជនបរទេសផងដែរ។
ឯកឧត្តម ហ៊ុន ម៉ានី សង្កត់ធ្ងន់ថាគោលបំណងនៃការត្បាញក្រមាវែងជាងគេនេះ គឺដើម្បីលើកកម្ពស់មោទនភាពជាតិ និងបង្កើតឱកាសឲ្យប្រជាពលរដ្ឋខ្មែរទាំងអស់រួមគ្នាថែរក្សា លើកស្ទួយ មរតកវប្បធម៌ប្រពៃណីខ្មែរ ជាពិសេសការជំរុញសាមគ្គីភាព និងឯកភាពជាតិ។
សូមបញ្ជាក់ថា ក្រមាខ្មែរដែលមានប្រវែងវែងជាងគេនេះ បានចំណាយពេលត្បាញជាង៥ខែ គឺបានចាប់ផ្តើមដំណើរការកាលពីថ្ងៃទី១៤ ខែកុម្ភៈ ឆ្នាំ២០១៨ មានទីតាំងស្ថិតនៅវាលព្រះមេរុ រាជធានីភ្នំពេញ។
