ភ្នំពេញៈ អគ្គលេខាធិការរដ្ឋសភា បានចេញលិខិតនៅថ្ងៃទី២៥ ខែកក្កដា ឆ្នាំ២០១៨នេះ ជូនលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ពាក់ព័ន្ធនឹងការគូសសញ្ញាគាំទ្រគណបក្សលើសន្លឹកឆ្នោត ដែលបញ្ជាក់ថា គឺរដ្ឋសភាពុំមានសមត្ថកិច្ចជ្រៀតជ្រែក ឬបង្គាប់បញ្ជាកិច្ចការរបស់គណៈកម្មការជាតិរៀបចំការបោះឆ្នោត ដែលជាស្ថាប័នឯករាជ្យបានឡើយ ។
លិខិតរបស់ លោក ឡេង ប៉េងឡុង អគ្គលេខាធិការរដ្ឋសភា បានលើកឡើងថា ចាប់តាំងពីថ្ងៃទី៩ ខែកក្កដា ឆ្នាំ២០១៨ កន្លងមកនេះ រដ្ឋសភា នីតិកាលទី៥ បានបិទសម័យប្រជុំលើកទី១០ នីតិកាលទី៥ មានន័យថា រដ្ឋសភា បានបញ្ចប់នីតិកាលរបស់ខ្លួនហើយ។ បច្ចុប្បន្ននេះ តំណាងរាស្ត្រដែលជាបេក្ខជន កំពុងចូលរួមយុទ្ធនាការឃោសនាបោះឆ្នោត ជ្រើសតាំងតំណាងរាស្ត្រ នីតិកាលទី៦ ។ ចំណែកឯរដ្ឋសភា បច្ចុប្បន្ននេះ មានសិទ្ធិត្រឹមតែអនុវត្តន៍ការងារប្រចាំថ្ងៃប៉ុណ្ណោះ ពុំអាចចាត់ចែងការងារដ៏ទៃបានឡើយ ជាពិសេស ការងារពាក់ព័ន្ធនឹងស្ថាប័នដ៏ទៃ ដូចជាគណៈកម្មាធិការជាតិរៀបចំការបោះឆ្នោត ជាដើម ។
អនុលោមតាមមាត្រា១៥០ថ្មី (ពីរ) នៃរដ្ឋធម្មនុញ្ញ កថាខណ្ឌទី២ ចែងថា “គណៈកម្មាធិការជាតិរៀបចំការបោះឆ្នោត ត្រូវអនុវត្តសមត្ថកិច្ចរបស់ខ្លួន ប្រកបដោយឯករាជ្យ និងអព្យាក្រឹត ដើម្បីធានាឲ្យការបោះឆ្នោត ប្រព្រឹត្តទៅដោយសេរី ត្រឹមត្រូវ និងយុត្តិធម៌ ស្របតាមគោលការណ៍ នៃលទ្ធិប្រជាធិបតេយ្យ សេរីពហុបក្ស” និងមាត្រា១៣ នៃច្បាប់ស្តីពីការរៀបចំ និងការប្រព្រឹត្តទៅ នៃគណៈកម្មាធិការជាតិរៀបចំការបោះឆ្នោត កថាខណ្ឌទី១ ចែងថា “ប្រធាន អនុប្រធាន និងសមាជិកគណៈកម្មាធិការជាតិរៀបចំការបោះឆ្នោត ត្រូវអនុវត្តតួនាទីរបស់ខ្លួន ដោយមិនលម្អៀង ដោយឈរលើគោលការណ៍គោរពច្បាប់ ដោយមិនទទួលការគាបសង្កត់ ការគំរាមកំហែង ការបំភិតបំភ័យ ឬការបង្គាប់បញ្ជាដោយផ្ទាល់ ឬដោយប្រយោលពីបុគ្គល ឬស្ថាប័នណាមួយឡើយ” ដូច្នេះ រដ្ឋសភាពុំមានសមត្ថកិច្ចជ្រៀតជ្រែក ឬបង្គាប់បញ្ជាកិច្ចការរបស់គណៈកម្មការជាតិរៀបចំការបោះឆ្នោត ដែលជាស្ថាប័នឯករាជ្យបានឡើយ៕