ភ្នំពេញៈ រដ្ឋមន្រ្ដីក្រសួងមហាផ្ទៃ បញ្ជាឲ្យកម្លាំងសមត្ថកិច្ចទាំងអស់ ត្រូវត្រៀមលក្ខណបង្ការការពារសន្ដិសុខ នៅកំឡុងពេលបោះឆ្នោត ខណៈដែលការបោះឆ្នោតជ្រើសតាំងតំណាងរាស្រ្ដ នីតិកាលទី៦ នឹងឈានមកដល់នាពេលខាងមុនេះ ដើម្បីឲ្យការបោះឆ្នោតប្រព្រឹត្ដិដោយភាពរលូន និងគ្មានហិង្សា ។
ថ្លែងក្នុងពិធីប្រគល់ទោចក្រយានយន្ត ជូនប៉ុស្តិ៍នគរបាលរដ្ឋបាលទូទាំងប្រទេស នាព្រឹកថ្ងៃទី១៨ ខែកក្កដា ឆ្នាំ២០១៨នេះ នៅក្រសួងមហាផ្ទៃ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានបញ្ជាឲ្យសមត្ថកិច្ច កងកម្លាំង និងអាជ្ញាធរដែនដីទាំងអស់ ត្រូវខិតខំត្រៀមលក្ខណបង្ការការពារក្នុងបរិយាកាសក្នុងកំពុងពេលបោះឆ្នោតជ្រើសតាំងតំណាងរាស្រ្ដ នីតិកាលទី៦ ឲ្យកាន់តែមានប្រសិទ្ធភាពខ្ពស់ ដើម្បីការពារនៅពេលដែលជនណាបង្ករបញ្ហា អុកឡុកឲ្យមានភាពចលាចលក្នុងពេលបោះឆ្នោត ។
សម្ដេចបានបញ្ជាក់ថា ការត្រៀមលក្ខណបង្ការការពារក្នុងពេលបោះឆ្នោតនេះ ដើម្បីការពារសន្ដិសុខ សណ្ដាប់ធ្នាប់ ជូនដល់ប្រជាពលរដ្ឋកុំឲ្យពួកគាត់មានការភ័យខ្លា នៅពេលទៅចូលរួមបោះឆ្នោត ដើម្បីធានាថា ការបោះឆ្នោតប្រព្រឹត្ដិដោយភាពរលូន និងគ្មានអំពើហិង្សា ។
សូមបញ្ជាក់ថា រដ្ឋាភិបាលកម្ពុជា បានត្រៀមកងកម្លាំង ប្រមាណ៨ម៉ឺននាក់ ដើម្បីចូលរួមការពារសន្តិសុខ និងសណ្តាប់ធ្នាប់ នៅក្នុងអំឡុងពេលបោះឆ្នោតជាតិ នាថ្ងៃទី២៩ ខែកក្កដាខាងមុខនេះ៕
