ខេត្តកំពង់ឆ្នាំង ៖ នៅរសៀលវេលាម៉ោង៣ និង៣០នាទី ថ្ងៃទី០១ ខែកក្កដា ឆ្នាំ២០១៨ ខណៈមានខ្យល់បោកបក់យ៉ាងខ្លាំងបណ្តាលឲ្យប៉ើងឆ័ត្រ ទៅបោកចំក្បាលស្ត្រី និងកូន បណ្ដាលឲ្យស្លាប់ និងរងរបួស នៅពេលដែលកំពុងតែចូលរួមទស្សនាពិធីបុណ្យឡើងអ្នកតាម្ចាស់ស្រុក នៅចំណុចអ្នកតាឈើត្រាវ ស្ថិតនៅក្នុងភូមិចម្ការចេក ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចបានឲ្យដឹងថា នៅចំណុចកើតហេតុខាងលើ មានរៀបចំពីធីបុណ្យឡើងអ្នកតាដូចរៀងរាល់ឆ្នាំ រយៈពេល៣យប់៣ថ្ងៃ ហើយនៅរសៀលថ្ងៃទី០១ ខែកក្កដា ឆ្នាំ២០១៨ ខណៈនោះស្រាប់តែពេលនោះ មានខ្យល់បោកបក់យ៉ាងខ្លាំង របស់របរជាច្រើន បានប៉ើងតាមខ្យល់ សូម្បីតែពោង យ៉ាងធំសម្រាប់ក្មេងលោតលេង ក៏ត្រូវប៉ើងដែរ ហើយពេលនោះក៏មានឆ័ត្រ របស់ម្ចាស់ពោង បានប៉ើងទៅបោកក្បាលស្រី្តរងគ្រោះ ដែលកំពុងនាំកូនអោយជិះសេះវិល បណ្តាលឲ្យស្លាប់ភ្លាមនៅនឹងកន្លែងតែម្តង ចំណែកកូនស្រីអាយុ៩ឆ្នាំបានធ្លាក់ពីលើសេះរងរបួសបាក់ដៃ។
ស្ត្រីរងគ្រោះខាងលើមានឈ្មោះ យ៉េ ស្រីណេត អាយុ៣៣ឆ្នាំ មានទីលំនៅភូមិ ឧទ្ទម្ពរ ឃុំស្វាយជ្រុំ ស្រុករលាប្អៀរ ចំណែកកូនស្រីរងរបួសបាក់ដៃមានឈ្មោះ ណា ធារី អាយុ៩ឆ្នាំ។
ក្រោយពេលកើតហេតុ គេឃើញប្តីស្រីរងគ្រោះ មកទទួលយកសពស្ត្រីជាប្រពន្ធ និងស្រែកទ្រហោយំ ក្នុងក្តីសោកស្តាយក្រៃលែង មិនគួរប្រពន្ធ និងកូនមករងគ្រោះដោយធម្មជាតិដ៏កម្រនេះទាល់តែសោះ។
ដោយឡែកម្ចាស់ឆ័ត្រមានឈ្មោះ សេង សំអឿន អាយុ៥៩ឆ្នាំ មានទីលំនៅភូមិទ័ពត្បែង ឃុំបបន្ទាយព្រាល ស្រុករលាប្អៀរ ត្រូវបានសមត្ថកិច្ចនគរបាលឃាត់ខ្លួន យកមកកាន់ស្នងការដ្ឋាននគរបាលខេត្ត ដើម្បីធ្វើការសាកសួរតាមនីតិវិធី៕
