ភ្នំពេញៈ យុវជនម្នាក់ត្រូវនគរបាលប៉ុស្តិ៍រដ្ឋបាលអូរឡាំពិកឃាត់ខ្លួនបន្ទាប់ពីធ្វើសកម្មភាពឆក់ខ្សែកបានសម្រេច ប៉ុន្តែរត់មិនរួចពីកណ្ដាប់ដៃសមត្ថកិច្ច។
ហេតុការណ៍នេះ បានកើតឡើងកាលពីវេលាម៉ោង១ និង៤០នាទីរសៀល ថ្ងៃអាទិត្យ ៤រោច ខែបឋមាសាធ ឆ្នាំច សំរឹទ្ធស័ក ព.ស.២៥៦២ ត្រូវនឹងថ្ងៃទី១ ខែមិថុនា ឆ្នាំ២០១៨ ចំណុចខាងមុខសកលវិទ្យាស្ថាន ធនធានមនុស្ស តាមបណ្ដោយផ្លូវលេខ១៦៣ ស្ថិតក្នុងសង្កាត់អូឡាំពិក ខណ្ឌចំកាមន។
ជនសង្ស័យដែលឃាត់ខ្លួនឈ្មោះ ឈួន ភក្តី ភេទប្រុស អាយុ២៩ឆ្នាំ មុខរបរមិនពិតប្រកដ ស្នាក់នៅផ្ទះគ្មានលេខ ផ្លូវលំ សង្កាត់អូរ១ ខេត្តព្រះសីហនុ ។
លោក អួន រតនៈ នាយប៉ុស្តិ៍នគរបាលរដ្ឋបាលអូរឡាំពិកបានប្រាប់ឲ្យដឹងថា នៅមុនពេលកើតហេតុ គឺជនរងគ្រោះបានចេញពីពិសាអាហារនៅម្តុំទួលទំពូងជាមួយមិត្តភ័ក្តជាង១០នាក់ គោលបំណងទៅធ្វើការវិញ។ ប៉ុន្តែនៅពេលដែលជិះមកដល់ចំណុចកើតហេតុខាងមុខសកលវិទ្យាស្ថានធនធានមនុស្ស ក៏មានជនសង្ស័យម្នាក់ជិះម៉ូតូ១គ្រឿងម៉ាកហុងដាស្គូពី ពណ៌ស ពាក់ស្លាកលេខ បាត់ដំបង 1N-3209 ធ្វើដំណើតាមបណ្ដោយផ្លូវលេខ១៦៣ ក្នុងទិសដៅពីត្បូងទៅជើងមកពីក្រោយជនរងគ្រោះរួចក៏ធ្វើសកម្មភាពឆក់ខ្សែកបានសម្រេច ប៉ុន្តែក៏ត្រូវនគរបាលប៉ុស្តិ៍រដ្ឋបាលអូឡាំពិកល្បាត ឃើញទាន់ដេញតាមឃាត់ខ្លួនជាក់ស្តែងតែម្តង។
បច្ចុប្បន្នជនសង្ស័យខាងលើ រួមទាំងវត្ថុតាង ត្រូវបាននគរបាលប៉ុស្តិ៍រដ្ឋបាលអូឡាំពិកសួរនាំ និងកសាងសុំណុំរឿងបញ្ជូនខ្លួនទៅអធិការដ្ឋាននគរបាលខណ្ឌចំការមនចាត់ការតាមនីតិវិធីបន្ត៕
