Thursday, August 2, 2018

ប្រមូល​ផ្ដុំ​គ្នា​ជក់​គ្រឿង​ញៀន​ក្នុង​ផ្ទះ​សំណាក់​​ “ឡាលីន​” ក្រុង​តាខ្មៅ​ សមត្ថកិច្ចក្រសោបបាន៦នាក់​

ពិសី

កណ្ដាលៈ កម្លាំង​​នគរបាល​ក្រុង​តាខ្មៅ​ កាលពី​​ថ្ងៃទី​១​ ខែ​សីហា​ ឆ្នាំ២០១៨ បានឆ្មក់បង្ក្រាប​ ក្នុងផ្ទះ​សំណាក់ “​ឡាលីន”​ ​ស្ថិត​នៅ​ភូមិ​ដើម​មាន​ សង្កាត់​ដើម​មាន​ ក្រុង​តាខ្មៅ​ ចំនួន២បន្ទប់​លេខ​១០១និង​១០២ ឃាត់ខ្លួន​មនុស្ស​​ប្រុសស្រី​៦នាក់​ រួម​ទាំង​គ្រឿង​ញៀន​ចំនួន​ជាង​៣០កញ្ចប់​។

សមត្ថកិច្ច ​បានឲ្យដឹងថា ​មនុស្ស​ប្រុស​ស្រី​៦នាក់ ​កំពុង​ពពាក់​ពពូន​គ្នា​ជក់​គ្រឿង​ញៀន ក្នុងផ្ទះសំណាក់ខាងលើ​ ខណៈពេលឃើញសមត្ថកិច្ចទៅដល់​ ពួកគេ​បាន​បោះចោល​វត្ថុតាង​ចូល​ក្នុង​បង្គន់​ ដើម្បី​បំបិទ​ភស្តុតាង​ផងដែរ​ ។

បើតាមមជ្ឈដ្ឋាន​មួយ​ចំនួន​ សង្ស័យ​ថា​ ម្ចាស់​ផ្ទះ​អាច​បើក​ភ្លើង​ខៀវ ទើបពួកជនទាំងនោះអាចប្រើប្រាស់ថ្នាំញៀនបាន​​ គួរណាស់​សមត្ថកិច្ច​ស៊ើបអង្កេត​ឲ្យ​បាន​ល្អិតល្អន់​។

ក្នុងករណីបង្ក្រាបគ្រឿងញៀនខាងលើនេះ សមត្ថកិច្ចបានដកហូត ​ម៉ូតូ៣គ្រឿង​ទូរសព្ទ័ដៃ ម៉ាក Samsung 6គ្រឿង ទូរសព្ទ័ម៉ាក Oppo ១គ្រឿង ទូសព្ទ័ដៃម៉ាក NOKiA 3គ្រឿង នាឡិការដៃ២គ្រឿង និងលុយខ្មែរចំនួន២លានរៀល។

ចំពោះជនសង្ស័យ និងវត្ថុតាងកសាងសំណុំរឿងបញ្ជូនខ្លួនទៅតុលាការដើម្បីចាត់ការតាមនីតិវិធីច្បាប់ ។ បើតាម​អ្នក​ច្បាប់​អះអាង​ថា​ បើ​ត្រឹម​តែ​ជក់​គ្រឿង​ញៀន​ អាច​មាន​វិធានការ​អប់រំ​បាន​ តែ​បើ​ចូល​លក្ខណៈ​ជួញដូរ​គ្រឿងញៀន​ផង​ ជក់ផង​ គឺ​ច្បាប់​មិន​លើកលែង​ទេ​ ពោល​គឺ​ ទ្វារ​គុក​ជំហរ​បើក​ទ្វារ​រង់ចាំ​ហើយ​ ៕

@Amapapa.News

Feature Ads