ក្រចេះ៖ ជនសង្ស័យម្នាក់ ត្រូវបានកម្លាំងនគរបាលប៉ុស្តិ៍ចំបក់ និងកម្លាំងប្រជាការពារ ស្ទាក់ចាប់បានភ្លាមៗ កាលពីម៉ោង៤ល្ងាចថ្ងៃទី២៦ ខែសីហា ឆ្នាំ២០១៨ ត្រង់ចំណុចវាលភ្នំធំ ភូមិជ្រោយថ្ម ឃុំចំបក់ ស្រុកព្រែកប្រសព្វ ខេត្តក្រចេះ បន្ទាប់ពីរូបគេធ្វើសកម្មភាពលួចមួយគ្រឿង ។
សមត្ថកិច្ច បានឲ្យដឹងថា ជនសង្ស័យឈ្មោះ ម៉ាត់ យ៉េស ភេទប្រុសអាយុ២១ឆាំ្ន ខ្មែរអ៊ីស្លាម រស់នៅភូមិជំនីក ឃុំជំនីក ស្រុកក្រូចឆ្មារ ខេត្តត្បូងឃ្មុំ ។ ម្ចាស់ម៉ូតូ ឈ្មោះ គា ធា ភេទប្រុសអាយុ៤៥ឆ្នាំ រស់នៅភូមិជ្រោយអំពិល១ ឃុំចំបក់ ស្រុកព្រែកប្រសព្វ ខេត្តក្រចេះ។
សតម្ថកិច្ច បានបន្តថា មុនពេលកើតហេតុ ជនសង្ស័យបានចូលទៅលួចយកម៉ូតូC១២៥ ផលិតឆ្នាំ២០១៥មួយគ្រឿង ចេញពីរោងចាំចំការ ហើយបញ្ឆេះមិនឆេះ ពេលនោះម្ចាស់ម៉ូតូមកទាន់ស្រែកថា ចោរៗ ធ្វើឲ្យជនសង្ស័យភ័យ ក៏រត់គេចខ្លួន ពេលនោះកម្លាំប៉ុស្តិ៍រដ្ឋបាលចំបក់ និងកម្លាំងប្រជាការពារ បានស្ទាក់ចាប់ជនសង្ស័យភ្លាមៗ ក្បែរកន្លែងកើតហេតុ និងធ្វើការឆែកឆេរដកហូតកូនសោចំនួន៩គ្រាប់ ចំពាមកៅស៊ូមួយ នាឡិកាដៃជ័រមួយ និងកូនកន្រ្ទៃមួយ។
បច្ចុប្បន្នជនសង្ស័យ ត្រូវបានឃាត់ខ្លួននៅប៉ុស្តិ៍នគរបាលរដ្ឋបាលចំបក់ ដើម្បីកសាងសំណុំរឿងបញ្ជូនទៅថ្នាក់លើចាត់ការបន្ត។ ចំណែកម៉ូតូម្ចាស់យកទៅរក្សាទុកដោយខ្លួនឯង៕