ស្នងការដ្ឋាននគរបាលខេត្តត្បូងឃ្មុំ បានចេញសេចក្តីជូនដំណឹងចុះថ្ងៃទី១៧ ខែសីហា ឆ្នាំ២០១៨ ស្តីពីការរៀបចំកន្លែងស្នាក់នៅសម្រាប់សិស្សានុសិស្សដែលជាបេក្ខជនត្រូវចូលរួមប្រឡងសញ្ញាបត្រមធ្យមសិក្សាទុតិយភូមិ។ សេចក្តីជូនដំណឹងនេះ មានសេចក្តីថា៖ ស្នងការដ្ឋាននគរបាលខេត្តត្បូងឃ្មុំ មានកិត្តិយសសូមជូនដំណឹងដល់មាតាបិតា ឬអាណាព្យាបាល និងប្អូនៗសិស្សានុសិស្ស ដែលជាបេក្ខជនត្រូវចូលរួមប្រឡងសញ្ញាបត្រមធ្យមសិក្សាទុតិយភូមិ នាសម័យប្រឡងថ្ងៃទី២០ ខែសីហា ឆ្នាំ២០១៨ ឱ្យបានជ្រាបថា៖
ក្នុងគោលបំណងដោះស្រាយការប្រឈមរបស់មាតាបិតា ឬអាណាព្យាបាល និងដើម្បីសម្រួលដល់ការស្នាក់អាស្រ័យរបស់របស់ប្អូនៗដែលមានលំនៅដ្ឋានឆ្ងាយៗមានជីវភាពខ្វះខាត គ្មានលទ្ធភាពជួលផ្ទះសំណាក់ និងគ្មានបងប្អូន ញាតិមិត្តក្នុងការសំណាក់អាស្រ័យនោះ ស្នងការដ្ឋាននគរបាលខេត្តត្បូងឃ្មុំ បានរៀបចំទីកន្លែងជួយសម្រួលបន្ទប់ស្នាក់នៅសមរម្យដល់ប្អូនៗចំនួន៤០កន្លែង ដែលមានទីតាំងស្ថិតនៅក្នុងអធិការដ្ឋាននគរបាលក្រុងសួង ដែលអាចឱ្យប្អូនៗ ស្នាក់នៅបាន។
សូមជម្រាបថា សម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៨នេះ សិស្សដែលបានដាក់ពាក្យប្រឡងមានចំនួន ១១៧ ០៦១នាក់ ចែកចេញជាពីរក្រុម គឺថ្នាក់វិទ្យាសាស្ត្រចំនួន ៥១,៧ភាគរយ និងថ្នាក់វិទ្យា សាស្ត្រសង្គមចំនួន ៤៨,៣ភាគរយ។ មណ្ឌលប្រឡងចំនួន១៩៥ មណ្ឌល ក្នុងនោះមណ្ឌលប្រឡងថ្នាក់វិទ្យាសាស្ត្រមានចំនួន ៩៩ មណ្ឌល និងថ្នាក់វិទ្យាសាស្ត្រសង្គមមានចំនួន៩៦ មណ្ឌល ព្រមទាំង ៤ ៧១៦បន្ទប់។ យោងតាមការចុះផ្សាយរបស់ក្រសួងអប់រំ យុវជន និងកីឡា។