Wednesday, August 29, 2018

ទិញម៉ូតូទឹកតម្លៃជិត២ម៉ឺនដុល្លារ ជិះលំហែលកាយតាមដងទន្លេ បាត់ខ្លួន៣ថ្ងៃ សមត្ថកិច្ចប្រទះឃើញតែម៉ូតូ

អាម៉ាប៉ាប៉ាញ៉ូស

​ភ្នំពេញៈ បើគិតមកត្រឹមម៉ោង១២ថ្ងៃត្រង់​ថ្ងៃទី២៩ ខែសីហា ឆ្នាំ២០១៨នេះ ក្រុមគ្រួសារ​ និងសាច់ញាតិ នៅ​មិនទាន់រកឃើញ​ជនរងគ្រោះ​នៅឡើយ​ ដោយមិនដឹងថា រស់ ឬស្លាប់នោះទេ  ខណៈសមត្ថកិច្ច​ប្រាប់​ថា ជនរងគ្រោះ បានបាត់ខ្លួនតាំងពី​ល្ងាច​ថ្ងៃទី២៦ ខែសីហា ឆ្នាំ២០១៨  បន្ទាប់ពីជិះម៉ូតូទឹកលំហែកាយតាម​ដង​ទន្លេមេគង្គ ស្ថិតក្នុង​ភូមិ​ល្វា សង្កាត់​កោះដាច់ ខណ្ឌ​ជ្រោយចង្វា។

សមត្ថកិច្ច បានបន្តថា ជនរងគ្រោះ​ឈ្មោះ​ ហុក ប៊ុន​ហ៊ុយ ហៅ តា​ហ៊ុយ ​អាយុជាង៤៧ឆ្នាំ ជា​អតីត​ថៅកែ​សណ្ឋាគារ​ឆាយ​ហុង បច្ចុប្បន្ន​ជា​ថៅកែ​ហាង​គុយទាវ​មួយកន្លែង នៅក្នុង​ភូមិ​ព្រែកលៀប សង្កាត់​ព្រែកលៀប ខណ្ឌ​ជ្រោយចង្វា។

សមត្ថកិច្ច បានបញ្ជាក់ថា នៅថ្ងៃកើតហេតុ ជនរងគ្រោះ​​បាន​យក​ម៉ូតូ​ទឹក ដែល​ទើប​ទិញ​ក្នុងតម្លៃ​ជិត២ម៉ឺន​ដុល្លារ ​បើក​លំហែកាយ​តាម​ដង​ទន្លេ ស្រាប់តែបាត់ដំណឹងឈឹង មិនដឹងថា គាត់ធ្លាក់ទឹក​ ឬយ៉ាងម៉េចឡើយ ខណៈ​ម៉ូតូ​ទឹក​​អណ្តែត​មកទើជាប់ដើមត្រែង ហើយ​ត្រូវសមត្ថកិច្ច​យកទៅ​រក្សា​ទុក។

ក្រោយពីប្រទះឃើញម៉ូតូទឹកខាងលើនេះហើយ ទើប​មានការ​ភ្ញាក់ផ្អើល​ដល់​ក្រុមគ្រួសារ​នាំគ្នា​ជួល​ទូក​ជួយ​រក តែ​រក​ពុំ​ឃើញ​សោះ ។

សមត្ថកិច្ច​បាន​ឲ្យ​ដឹង​ទៀតថា ខែ​នេះ​ជា​រដូវ​ទឹក​ឡើង ហើយទឹក​ក៏ហូរ​ខ្លាំងដែរ ដូច្នេះបើសិនជាគាត់ធ្លាក់ទឹកទន្លេ ហើយលង់ស្លាប់មែន សាកសពមិនដឹងថា ​បាន​អណ្តែត​ទៅដល់​ទីណាឡើយ៕

@Amapapa.News

Feature Ads