សៀមរាបៈ ជនសង្ស័យម្នាក់ ត្រូវបានប្រជាពលរដ្ឋក្របួចបានភ្លាមៗ បន្ទាប់ពីធ្វើសកម្មភាពកាច់សោកម៉ូតូមួយគ្រឿង នៅមុខផ្សារដំដែក ខេត្តសៀមរាប កាលពីវេលាម៉ោង៦៖៣០នាទីព្រឹកថ្ងៃទី២៥ ខែសីហា ឆ្នាំ២០១៨។
ជនសង្ស័យឈ្មោះ ឆែម ម៉ៅ ហៅ គក់ ភេទប្រុស អាយុ៣៩ឆ្នាំ មានទីលំនៅភូមិ គោកតាងួន ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ។ ម្ចាស់ម៉ូតូឈ្មោះ ឈិន មុំ ភេទស្រី អាយុ៥៣ឆ្នាំ មុខរបរ លក់ដូរ មានទីលំនៅភូមិ ដំដែកលើ ឃុំដំដែក ស្រុកសូទ្រនិគម ខេត្តសៀមរាប។
ជនរងគ្រោះ បានឲ្យដឹងថា មុនពេលកើតហេតុ គាត់បានជិះម៉ូតូម៉ាកហុងដា សេ១២៥ សេរីឆ្នាំ២០១៨ពណ៌ខ្មៅ មិនទាន់ធ្វើស្លាកលេខ មកផ្សារដំដែក ហើយបានទុកផ្ញើនិងគេ រួចដើរចូលផ្សារ បន្ដិចក្រោយមកជនសង្ស័យខាងលើ បានដើរចូលទៅតម្រង់ម៉ូតូ ហើយកាច់សោកតែម្តង ពេលនោះអ្នកជិតខាងឃើញទាន់ ក៏ស្រែកឆោឡោឡើងនាំគ្នាចាប់ជាប់បានភ្លាមៗតែម្ដង។
ក្រោយកើតហេតុជនសង្ស័យ ត្រូវបានប្រជាពលរដ្ឋប្រគល់ឲ្យសមត្ថកិច្ចនាំខ្លួនយកទៅសាកសួរនៅអធិការដ្ឋាន។ ក្រោយពេលសាកសួររួច ជនសង្ស័យបានសារភាពថា ខ្លួនពិតជាបានកាច់សោកម៉ូតូខាងលើប្រាកដមែន ខណៈដែលសមត្ថកិច្ចបានដកហូតសម្ភារៈកាច់សោកម៉ូតូមួយសម្រាប់ផងដែរ៕