ប្រទេសកូរ៉េៈ ថ្នាក់ដឹកនាំស្ថាប័នវ័យក្មេង២រូប បានជំនួបពិភាក្សាការងារជាមួយគ្នា ដើម្បីជំរុញនិងអូសទាញអ្នកវិនិយោគទុនកូរ៉េ មកធ្វើការវិនិយោគ នៅខេត្តកំពង់ស្ពឺ នៃប្រទេសកម្ពុជា ជាពិសេស ពាក់ព័ន្ធនឹងវិស័យបច្ចេកវិទ្យា ការនាំចេញដំណាំស្វាយ និងសាច់មាន់ទៅកូរ៉េ ។
ការជំនួបពិភាក្សាការងារ និងជំរុញឲ្យមានការវិនិយោគពីប្រទេសកូរ៉េនេះ បានធ្វើឡើងកាលពីរសៀលថ្ងៃទី២៧ ខែសីហា ឆ្នាំ២០១៨ ខណៈដែលលោក វ៉ី សំណាង អភិបាលខេត្តកំពង់ស្ពឺ បានដឹកនាំគណៈប្រតិភូខេត្តកំពង់ស្ពឺ ចូលជួបសម្ដែងការគួរសមជាមួយលោក ឡុង ឌីម៉ង់ ឯកអគ្គរាជទូតកម្ពុជា ប្រចាំប្រទេសកូរ៉េ នៅប្រទេសកូរ៉េខាងត្បូង ។
ក្រៅពីជំនួបពិភាក្សាគ្នាហើយ ថ្នាក់ដឹកនាំស្ថាប័នវ័យក្មេងទាំងពីរ បានជំរុញនិងអូសទាញអ្នកវិនិយោគទុនកូរ៉េ មកធ្វើការវិនិយោគនៅកំពង់ស្ពឺ ឲ្យកាន់តែច្រើនថែមទៀត ជាពិសេស ពាក់ព័ន្ធនឹងវិស័យបច្ចេកវិទ្យា និងការនាំចេញដំណាំស្វាយ និងសាច់មាន់ទៅកូរ៉េ ។
ថ្នាក់ដឹកនាំស្ថាប័នវ័យក្មេងទាំងពីរ សុទ្ធជាយុវជនបានចែករំលែកបទពិសោធន៍ពាក់ព័ន្ធនឹងការដឹកនាំ គ្រប់គ្រង និងបញ្ជាអង្គភាព ជាមួយនឹងឆន្ទៈក្នុងការធ្វើកំណែទម្រង់ស្ថាប័ន និងប្រព័ន្ធរដ្ឋបាល ឆ្លើយតបនឹងតម្រូវការ សភាពការណ៍បច្ចុប្បន្នរបស់ជាតិ និងប្រជាជន៕