ភ្នំពេញៈ របាំងថ្មពុះចែកទ្រូងផ្លូវ១កង់ ត្រូវបានខ្ទាតចេញពីសភាពដើម បន្ទាប់ពីជនជាតិចិនបើករថយន្តលឿនដូចគេហោះ ហើយក៏ជ្រុលចង្កូតទៅបុកពេញទំហឹង ធ្វើឲ្យរថយន្តបែកកង់ខាងឆ្វេងទៅមុខលែងរួច។ គ្រោះថ្នាក់ចរាចរណ៍នៅស្រុកខ្មែរ ដែលបង្កដោយជនជាតិចិននេះ កើតឡើងនៅវេលាម៉ោង៩និង២០នាទីយប់ ថ្ងៃទី២៧ ខែសីហា ឆ្នាំ២០១៨ ស្ថិតតាមបណ្ដោយផ្លូវ២១៧ ចំណុចខាងជើងថៃប៊ុនរ៉ុង ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
អ្នកឃើញហេតុការណ៍បានប្រាប់ឲ្យដឹងថា មុនពេលកើតហេតុ គេឃើញជនជាតិចិនប្រុសស្រី៥នាក់ បើករថយន្ត Pirus មួយគ្រឿង ពណ៌ស ពាក់ស្លាកលេខភ្នំពេញ 2AV-6221 ធ្វើដំណើរពីកើតទៅលិចក្នុងល្បឿនលឿន ខណៈមកដល់ចំណុចកើតហេតុខាងលើ បានរេចង្កូតមកខាងឆ្វេងជ្រុលទៅបុកទ្រូងផ្លូវ បណ្ដាលឲ្យខ្ទាតចេញពីជួរអស់១កង់ រថយន្តរងការខូចខាត និងបែកកង់មុខខាងឆ្វេង ហើយព្យាយាមបើកមកអែបចិញ្ចើមផ្លូវ បន្ទាប់មកជនជាតិចិនទាំងនោះ បានគេចខ្លួនម្ដងៗម្នាក់ បាត់អស់ពីន្លែងកើតហេតុ។
ក្រោយកើតហេតុសមត្ថកិច្ចមូលដ្ឋានទាក់ទងជំនាញមកធ្វើការវាស់វែង និងស្ទូចយករថយន្តបង្កទៅរក្សាទុកនៅការិយាល័យចរាចរណ៍ជើងគោក នៃស្នងការរាជធានីភ្នំពេញ រង់ចាំដោះស្រាយតាមផ្លូវច្បាប់៕
