Wednesday, August 15, 2018

ឃាត់​ខ្លួន​បុរស​ម្នាក់​​ទាក់ទងនិងគ្រឿងញៀន នៅ​ក្រុង​បាវិត

អាម៉ាប៉ាប៉ាញ៉ូស

ខេត្ត​ស្វាយ​រៀង ៖ នៅ​វេលា​ម៉ោង ១៧.៣០ នាទី​ថ្ងៃ​ទី ១៣ ខែ​សីហា ឆ្នាំ​២០១៨ កម្លាំង​មន្ទីរ​យុត្តិធម៌ កងរាជ​អាវុធ​ហត្ថ​ខេត្ត​ស្វាយ​រៀង​បាន សហការ​ជា​មួយ កម្លាំង​មូលដ្ឋាន​កងរាជ​អាវុធ​ហត្ថ​ក្រុង​បាវិត ដឹក​នាំ​ដោយ​លោក​វរសេនីយ៍ឯក ស្រី វុត្ថា មេបញ្ជាការ​រង​ទទួល​ការ​ងារ​យុត្តិធម៌​និង​មាន​ការសម្រប​សម្រួល​ដោយ​លោក គង់ ចន្ទខេមរិទ្ធ ព្រះ​រាជអាជ្ញា​នៃ​អយ្យការអម​សាលា​ដំបូង​ខេត្ត​ស្វាយ​រៀង ចុះ​បង្ក្រាប​ករណី​រក្សា​ទុក ឬ ជួញដូរ​ដោយ​ខុស​ច្បាប់​នូវ​សារ​ធាតុ​ញៀន នៅ​ចំណុច បន្ទប់​ជួល​លេខ ០៥ ក្នុង​ផ្ទះ​ជួល​រ៉ាន់ណាបុផ្ផាបាវិត ស្ថិត​នៅ​ភូមិ បាវិត​កណ្ដាល សង្កាត់ បាវិត ក្រុង​បាវិត ខេត្ត​ស្វាយ​រៀង ឃាត់​ខ្លួន​ជន​សង្ស័យ​បាន​ចំនួន ០១ នាក់ ប្រុស រួច​ឆែកឆេរ​ក្នុង​បន្ទប់​រក​ឃើញ​ថ្នាំ​ញៀន ចំនួន ០៥ កញ្ចប់​(ធំ ០២ កញ្ចប់ តូច ០៣ កញ្ចប់) ។

សមត្ថកិច្ច​បាន​ឱ្យ​ដឹងថា​ ៖ ជន​សង្ស័យ​មាន ឈ្មោះ ហៀង ថារិទ្ធរង្សី ហៅ ណៃ ភេទ​ប្រុស អាយុ ១៩ ឆ្នាំ ជន​ជាតិ​ខ្មែរ មុខ​របរ​មិន​ពិត​ប្រាកដ​មាន​ទីលំ​នៅ​បច្ចុប្បន្ន​ភូមិ​តាបិប សង្កាត់​បាវិត ក្រុង​បាវិត ខេត្ត​ស្វាយ​រៀង ។ ចាប់​យក​វត្ថុ​តាង​រួម​មាន ៖

១.ម្សៅក្រាម​ពណ៌​សថ្លា ចំនួន ០៥ កញ្ចប់​(ធំ ០២ កញ្ចប់ តូច ០៣ កញ្ចប់) ។

២.​ទូរសព្ទ​ដៃ ចំនួន ០១ គ្រឿង​។

៣.កាបូប​ដៃ​តូច​ចំនួន ០១។

៤.ថង់​សម្រាប់​ដាក់​គ្រឿង​ញៀន​មួយ​ចំនួន ។ បច្ចុប្បន្ន ជន​សង្ស័យ និង​វត្ថុ​តាង កំពុង​កសាង​សំណុំ​រឿង បញ្ជូន​ទៅ​​តុលា​ការ ៕

@Amapapa.News

Feature Ads