Monday, August 20, 2018

រដ្ឋាភិបាលវៀតណាម អបអរសាទរសម្តេចតេជោ ហ៊ុន សែន ក្រោយព្រះមហាក្សត្រត្រាស់តាំងជានាយករដ្ឋមន្ត្រី នីតិកាលទី៦

រិទ្ធី

រដ្ឋាភិបាល​សង្គមនិយម​ នៃ​ប្រទេស​វៀតណាម​ បាន​សម្ដែង​ការ​អបអរសាទរ​ សម្ដេចតេជោ ​នាយក​រដ្ឋមន្ត្រីនៃព្រះរាជាណាចក្រកម្ពុជា​ ដែល​ត្រូវ​បាន​ព្រះមហាក្សត្រ​ តែងតាំង​ជា​ថ្មី​ម្ដងទៀត​ ឱ្យ​​បន្ត​កាន់​តំណែង​ជា​នាយក​រដ្ឋមន្ត្រី​ អាណត្តិ​ទី៦នេះ​ ការ​ថ្លែង​សាទររបស់​រដ្ឋាភិបាល​វៀតណាម​នេះ ធ្វើ​ឡើង​តាម​រយៈអ្នកនាំពាក្យ​ក្រសួងការបរទេស​។ ​នេះបើយោងតាមសារព័ត៌មាន​វៀតណាម។

​​លោកស្រី​ Lê​ Thị​ Thu​ Hằng​ បាន​ប្រាប់​អ្នក​សារព័ត៌មាន​ថា៖​ ឋានៈ​ជា​ប្រទេស​ជិតខាង​ជាមួយ​កម្ពុជា​ ប្រទេសវៀតណាម​ សូម​សាទរ​សម្ដេចតេជោ​ ហ៊ុន​ សែន​ ចំពោះ​ការ​តែងតាំង​ជា​នាយក​រដ្ឋមន្ត្រី​ ដោយ​ព្រះមហាក្សត្រ​ ការ​កាន់​តំណែង​ជា​ថ្មី​ម្ដងទៀត​នេះ​ គឺជា​បេសកកម្ម​នៃ​ការ​បង្កើត​រាជរដ្ឋាភិបាល​ ដើម្បី​សុំ​ការ​អនុម័ត​ពី​រដ្ឋសភា​។​

​អ្នកនាំពាក្យ​បាន​បញ្ជាក់​ថា​ ក្នុង​នាម​ជា​ប្រទេស​ជិតខាង​ វៀតណាម​ មានការ​ជឿជាក់​ថា​ រាជរដ្ឋាភិបាល​ និង​ សភា​ថ្មី​ នៃ​ប្រទេស​កម្ពុជា​ នឹង​បន្ត​ដឹកនាំ​ពុះពារ​ និង​ចូលរួម​ចំណែក​ដើម្បី​សន្តិភាព​ ស្ថិរភាព​ សហប្រតិបត្តិការ​ និង​ការ​អភិវឌ្ឍ​ សម្រាប់​តំបន់​និង​ពិភពលោក​។​

សូមរំលឹកថា ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា​ បានត្រាស់បង្គាប់ចាត់តាំងសម្តេចតេជោ ហ៊ុន​ សែន ជានាយករដ្ឋមន្រ្តីនៃព្រះរាជាណាចក្រកម្ពុជា សម្រាប់អាណត្តិទី ៦ កាលពីថ្ងៃទី១៧ ខែ សីហា ឆ្នាំ ២០១៨។

​​ជា​ការ​កត់សម្គាល់​ ការ​អបអរសាទរ​ និង​ ការ​បន្ថោក​ការ​បោះ​ឆ្នោត​ មានប្រទេស​ចិន​ វៀតណាម​ ឡាវ​ ​ ក្រោយមក​ទៀត​មាន​តំណាង​ ថៃ​ សិង្ហ​បុរី​ និង​ហ្វី​លី​ពី​ន​ ឥណ្ឌា​ជាដើម​។​

តាមគម្រោងបេក្ខជនជាប់ឆ្នោតទាំង១២៦របស់គណបក្សប្រជាជនកម្ពុជានឹងប្រកាសសុពលភាពនៅថ្ងៃទី០៥ ខែកញ្ញា ហើយរដ្ឋាភិបាលថ្មីអាណត្តិទី៦នឹងប្រព្រឹត្តទៅនាថ្ងៃទី០៦ ខែកញ្ញា ចំណែកឯរដ្ឋសភាជាតិនឹងបើកប្រជុំជាលើកដំបូងនៅថ្ងៃទី០៧ ខែកញ្ញា ឆ្នាំ២០១៨ ខាងមុខ។

@Amapapa.News

Feature Ads