ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានសួរសំណួរជាសាធារណៈតាមរយៈគេហទំព័រហ្វេសប៊ុកថា៖ តើបងប្អូនជឿទេថាក្នុងរាជធានីភ្នំពេញ មានការបោះទុនវិនិយោគរហូតប្រមាណ២៥២លានដុល្លារលើវិស័យសំណង់? ហេតុអ្វីបានជាលោកអភិបាលចោទសួរបែបនេះ។
នៅព្រឹកថ្ងៃព្រហស្បតិ៍ ០៤រោច ខែស្រាពណ៌ ឆ្នាំច សំរឹទ្ធិស័កព.ស២៥៦២ ត្រូវនឹងថ្ងៃទី៣០ ខែសីហា ឆ្នាំ២០១៨ ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ បានអញ្ជើញចូលរួម និងសាក្សីក្នុងពិធីបញ្ចុះបឋមសិលាសាងសង់ផ្សារទំនើប ជីប ម៉ុង ២៧១ មេហ្គាម៉ល ស្ថិតនៅក្នុងគម្រោង ដឺ លែនម៉ាក ក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ក្រោមអធិបតីភាព ឯកឧត្ដម ជា សុផារ៉ា ទេសរដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
ឯកឧត្តមអភិបាលនៃគណៈអភិបាលរាជធានីភ្នំពេញ បន្តទៀតថា៖ ការវិនិយោគមួយនេះ នឹងលេចចេញជារូបរាងឡើងក្នុងឆ្នាំ២០២០ ដើម្បីបម្រើតម្រូវការសាធារណជនក្នុងរាជធានីភ្នំពេញ ជាពិសេសប្រជាពលរដ្ឋដែលរស់នៅជុំវិញតំបន់ដ៏ពោរពេញទៅដោយសក្ដានុពលសេដ្ឋកិច្ចមួយនេះ ដែលបានរចនាដោយអ្នកជំនាញអន្តរជាតិ និងត្រូវបានសាងសង់ឡើងដោយវិស្វករជំនាញជាតិ និងមានបទពិសោធន៍ជាច្រើនឆ្នាំក្នុងការងារសាងសង់ និងប្រើប្រាស់បច្ចេកវិទ្យាទំនើប ដើម្បីធានាសោភ័ណភាព និងគុណភាពសំណង់ស្របទៅតាមបទដ្ឋានអន្តរជាតិ។
ផ្សារទំនើប និងមជ្ឈមណ្ឌលពាណិជ្ជកម្មមួយនេះ នឹងត្រូវបានសាងសង់ក្នុងបរិវេណគម្រោង ដឺ លែនម៉ាក ២៧១ ដែលហ៊ុំព័ទ្ធទៅដោយតំបន់លំនៅដ្ឋានប្រណិតរាប់រយខ្នង អគារពាណិជ្ជកម្ម សណ្ឋាគារលំដាប់អន្តរជាតិ ខុនដូទាន់សម័យ និងអគារការិយាល័យដ៏ទំនើប។
ក្នុងនាមរដ្ឋបាលរាជធានីភ្នំពេញ ឯកឧត្តម ឃួង ស្រេង សូមស្វាគមន៍វិនិយោគិនជាតិ និងអន្តរជាតិទាំងអស់ដែលបានវិនិយោគលើគ្រប់វិស័យក្នុងប្រទេសកម្ពុជា ជាពិសេសរាជធានីភ្នំពេញ។
ឯកឧត្តមបានកោតសរសេរថាក្រោមការដឹកនាំដ៏ឈ្លាសវៃបំផុតរបស់ សម្ដេចអគ្គមហាសេនាបតីតេជោ ហ៊ុន សែន ប្រទេសកម្ពុជាមានស្ថិរភាព និងសន្តិភាពពេញលេញ បានធ្វើឱ្យជីវភាពប្រជាពលរដ្ឋកម្ពុជាកាន់តែធូធារ និងសម្បូរសប្បាយ របៀបរស់នៅកាន់តែស៊ីវិល័យ ដែលកត្តាទាំងនេះជាចលករណ៍យ៉ាងសំខាន់ក្នុងការជំរុញឱ្យក្រុមហ៊ុនជាតិ និងអន្តរជាតិជាច្រើនមកវិនិយោគលើគ្រប់វិស័យ ជាពិសេសរាជធានីភ្នំពេញជាបេះដូងនៃព្រះរាជាណាចក្រកម្ពុជា ហើយការវិនិយោគទាំងនេះបានចូលរួមចំណែកក្នុងការកាត់បន្ថយអត្រានៃភាពក្រីក្រតាមរយៈការបង្កើតការងារ កាត់បន្ថយការធ្វើចំណាកស្រុក និងលើកម្ពស់សេដ្ឋកិច្ចជាតិបានមួយកម្រិតទៀត។