រហូតមកដល់ថ្ងៃទី៣០ ខែសីហា ឆ្នាំ២០១៨ នេះ សមត្ថកិច្ចនៅពុំទាន់អាចចាប់ខ្លួនលោក សួស សុវណ្ណា មេបញ្ជាការងកងអាវុធហត្ថស្រុកសន្ទុក ខេត្តកំពង់ធំ និងជាប្រធានស្នាក់ការសន្តិសុខ៦០១ បាននៅឡើយទេ។ លោក សួស សុវណ្ណា ជាអ្នកបើករថយន្តទៅបុកជាមួយម៉ូតូមួយគ្រឿងជិះគ្នា២នាក់ ស្លាប់ទាំង២។
សូមរំលឹកថា៖ គ្រោះថ្នាក់ចរាចរណ៍នេះ បានកើតឡើងកាលពីថ្ងៃ២៥ ខែសីហា ឆ្នាំ២០១៨ លើផ្លូវទំនប់ ត្រង់ចំណុចទឹកវឹល ភូមិផ្លុង ឃុំទីពោធិ៍ ស្រុកសន្ទុក ខេត្តកំពង់ធំ រវាងរថយន្ត និងម៉ូតូ បើកបរក្នុងទិសដៅផ្ទុយគ្នា។ មកដល់កន្លែងកើតហេតុ រថយន្តបានបុកម៉ូតូបានបណ្តាលឱ្យស្លាប់មនុស្ស២នាក់ (អ្នកជិះម៉ូតូ)។
ម៉ូតូម៉ាកហុងដាឌ្រីមសង់សេ១២៥ ពណ៌ខ្មៅ ផ្លាកលេខ កំពង់ធំ 1J-5120 បើកបរទិសដៅពីលិចទៅកើត បើកបរដោយឈ្មោះ គង់ មករា ភេទប្រុស អាយុ១៨ឆ្នាំ រស់នៅភូមិតាំងក្រសាំង ឃុំតាំងក្រសាំង ស្រុកសន្ទុក ខេត្តកំពង់ធំ ពាក់មួកសុវត្ថិភាព ស្លាប់នៅកន្លែងកើតហេតុ និងអ្នករួមដំណើរឈ្មោះ ហេង គឹមហាន ភេទប្រុស អាយុ១៩ឆ្នាំ រស់នៅភូមិវាំងខាងត្បូង ឃុំតាំងក្រសាំង ស្រុកសន្ទុក ខេត្តកំពង់ធំ ស្លាប់នៅកន្លែងកើតហេតុ មិនពាក់មួកសុវត្ថិភាព។
ចំណែកអ្នកបើកបរ រថយន្តម៉ាកឡិចស៊ីច LX470 ពណ៌ស ផ្លាកលេខ កំពង់ធំ 2B.0601 បើកបរពីកើតទៅលិច ដោយឈ្មោះ សួស សុវណ្ណា ភេទប្រុស អាយុ៤៩ឆ្នាំ ជាមេបញ្ជាការរងកងអាវុធហត្ថស្រុកសន្ទុក និងជាប្រធានស្នាក់ការសន្តិសុខ៦០១ រស់នៅភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ ជិះគេចខ្លួនពីកន្លែងកើតហេតុ ដោយសុវត្ថិភាព។