Thursday, August 30, 2018

ខណ្ឌដូនពេញ កាន់តែសាហាវ! ចាំមិត្តស្រីចេញពីធ្វើការ ត្រូវក្មេងស្ទាវមួយក្រុម ព្រួតវាយទម្លាក់ទឹកទន្លេ ហើយគេចខ្លួនបាត់!

អាម៉ាប៉ាប៉ាញ៉ូស

ភ្នំពេញៈ កាន់តែសាហាវមែនហើយ បុរសម្នាក់ កំពុងឈរចាំមិត្តស្រីចេញពីធ្វើការ ត្រូវក្រុមក្មេងទំនើង៧ទៅ៨នាក់ បានព្រួតវាយទម្លាក់ចូលទឹកទន្លេ លិចបាត់ដំណឹងសូន្យឈឹងកាលពីរំលងអធ្រាត្រ ឈានចូលថ្ងៃទី៣០ ខែសីហា ឆ្នាំ២០១៨នេះ ស្ថិតនៅតាមផ្លូវស៊ីសុវត្ថិ ចំណុចជួរមាត់ទន្លេ ក្នុងសង្កាត់ផ្សារកណ្ដាល១ ខណ្ឌដូនពេញ រាជធានីភ្នំពេញ។

ជនរងគ្រោះឈ្មោះ គីម សានរ៉ាវុធ ហៅ (ស) ភេទប្រុស អាយុ២៦ឆ្នាំ មុខរបរនៅផ្ទះ ស្នាក់នៅក្នុងសង្កាត់ទួលសង្កែ ខណ្ឌឫស្សីកែវ​ រាជធានីភ្នំពេញ។

តាមសម្ដីអ្នកឃើញហេតុការណ៍ផ្ទាល់ សុំមិនបញ្ចេញអត្តសញ្ញាណ រៀបរាប់​ប្រាប់ភ្នាក់ងារខេមប៉ុស្តិ៍ថា នៅមុនពេលកើតហេតុ ជា​រើយៗគេតែងតែឃើញជនរងគ្រោះ មកអង្គុយនៅលើបង់មាត់ទន្លេ ដើម្បីចាំមិត្តស្រីរបស់ខ្លួនចេញពីធ្វើការក្នុងហាងបារាំង ជាប្រចាំស្ទើរតែរាល់យប់ទៅហើយ។ តែនៅយប់កើតហេតុ ជនរងគ្រោះ​បានដើរពាក់មួកពណ៌ខ្មៅ រួចមកអង្គុយនៅលើបង់មាត់ទន្លេ ដើម្បីចាំមិត្តស្រីរបស់ខ្លួនចេញពីធ្វើការដូចសព្វដង តែមិនដឹងមូលហេតុអ្វី ស្រាប់លេចមុខក្រុមក្មេងស្ទាវមានគ្នា៧-៨នាក់ ក្នុងនោះមានក្មេងស្ទាវ៣ទៅ៤នាក់ ប្រដាប់ដោយដំបងឈើ ដែលកាច់របងដើមឈើនៅសួរច្បារក្បែរនោះ កាន់ជាប់ដៃទៀត បានដើរសំដៅរកជនរងគ្រោះ រួចមិនបានសួរនាំអ្វីច្រើននោះទេ បាននាំគ្នាព្រួតគ្នាវាយ ខណៈជនរងគ្រោះមិនដឹងខ្លួន ទើបមិនអាចតដៃ​ ឬរត់គេចទៅណាបាន រហូតត្រូវបានក្រុមក្មេងស្ទាវទាំងនោះ វាយរហូតធ្លាក់ចូលទៅក្នុងទឹកទន្លេលិចបាត់ឈឹងតែម្ដង បន្សល់​ទុកតែមួកពណ៌ខ្មៅរបស់ជនរងគ្រោះនៅកន្លែងកើតហេតុតែប៉ុណ្ណោះ។ ភ្លាមៗនោះ ពួកគេជាជនដៃដល់បានរត់គេចខ្លួនបាត់ស្រមោលអស់។

ក្រោយកើតហេតុ សមត្ថកិច្ចមូលដ្ឋានមិនទាន់អាចបញ្ជាក់ប្រាប់ក្រុមអ្នកសារព័ត៌មានយើងបានទេ ព្រោះមិនចង់ឲ្យអ្នកសារព័ត៌មានចេញផ្សាយពីបញ្ហាអសកម្ម ដែលកើតមានក្នុងមូលដ្ឋានដែនសមត្ថកិច្ចរបស់ខ្លួន ទើបពេលចុះមកដល់កន្លែងកើតហេតុ បែរជាប្រញ៉ាប់នាំនារីម្នាក់ ដែលបានឃើញហេតុការណ៍នោះ យកទៅប៉ុស្តិ៍ដើម្បីសាកសួរបន្តឲ្យបាត់ពីកន្លែងកើតហេតុសិន។ ចំពោះហេតុការណ៍នេះ យើងក៏មិនទាន់ដឹងពីមូលហេតុច្បាស់លាស់យ៉ាងណានោះទេ ខណៈដែលសមត្ថកិច្ចជំនាញ នៃអធិការដ្ឋាននគរបាលខណ្ឌដូនពេញ​ សុំធ្វើការ​ស្រាវជ្រាវសិន។

​ជាមួយគ្នានេះ​កាលពីវេលាម៉ោង០៤ទាបភ្លឺ​ ឈានចូលថ្ងៃសុក្រ ទី១៧ ខែសីហា​ ឆ្នាំ២០១៨​កន្លងទៅថ្មីៗនេះដែរ ក៏មានករណីវាយប្លន់ជនបរទេសដែរ កើតឡើងត្រង់ចំណុចជាប់​វាលព្រះ​មេន តាមបណ្តោយផ្លូវ១៧៨ ស្ថិតក្នុងសង្កាត់ជ័យជំនះ ខណ្ឌដូនពេញ​ រាជធានីភ្នំពេញ ដែលបណ្ដាលឲ្យជនបរទេស​ម្នាក់របួសបែកមុខខ្ទេច ខណៈពេលដែលដើរចេញពីដកលុយក្នុងទូATM ត្រូវជនមិនស្គាល់អត្តសញ្ញាណមួយក្រុម ជិះម៉ូតូធំ វាយប្លន់យកអស់ពីខ្លួន តែម្ដង ដែលមិនរំខានសមត្ថកិច្ចសង្កាត់ជ័យជំនះបន្តិចឡើយ។

សូមបញ្ជាក់ថា​ កាលពី​ថ្ងៃ​ទី​២៧​ សីហា ២០១៨នេះ នៅ​រដ្ឋបាល​រាជធានី​ភ្នំពេញ​ ក្នុង​សន្និបាត​បូក​សរុប ការងារ​បោះ​ឆ្នោត​ជ្រើសរើស​តំណាងរាស្ត្រ នីតិកាល​ទី​៦ ឆ្នាំ​២០១៨ របស់​គណៈកម្មការ​រៀបចំ ការ​បោះ​ឆ្នោត​រាជធានី​ភ្នំពេញ កន្លង​មកនេះ លោក ឃួ​ង ស្រេង អភិបាល​រាជធានី​ភ្នំពេញ បាន​បញ្ជា​ឲ្យ​ប៉ូ​លី​ស​ប៉ុស្តិ៍​រដ្ឋបាល​សង្កាត់​ទាំង​១០៥ និង​អធិការ​ខណ្ឌ​ទាំង​១២ ត្រូវ​មាន​អ្នក​ប្រចាំការ​២៤​ម៉ោង​លើ​២៤​ម៉ោង ដូច​សាលាសង្កាត់​តែ​ម្តង ដើម្បី​រង់ចាំ​ទទួល​ពាក្យបណ្តឹង និង​អន្តរា​គម​ន៏​បាន​ទាន់​ពេល ជុំវិញ​បញ្ហា​សន្តិសុខ និង​បំរើ​ការងារ​ជូន​ប្រជាពលរដ្ឋ នៅ​ពេល​ពួក​គាត់​ត្រូវការ​បន្ទាន់។ ជុំវិញ​បញ្ហា​ប្រជាពលរដ្ឋ មក​ប៉ុស្តិ៍​ដាក់​ពាក្យបណ្តឹង ប៉ូលិស​ឆ្លើយ​ថា រឿង​តូចតាច​មិន​ចាំបាច់​ប្តឹង​នោះ​ឡើយ ដែល​បញ្ហា​នេះ​បាន​ធ្វើ​ឲ្យ​ប្រជាពលរដ្ឋ​មិន​ពេញចិត្ត ។ ដូច្នេះ ដើម្បី​បញ្ជៀ​សការ​ថ្នាំងថ្នាក់​ពី​ប្រជាពលរដ្ឋ​បន្ត​ទៀត​នោះ ប៉ូលិស​ប៉ុស្តិ៍​រដ្ឋបាល អធិការ​ខណ្ឌ ត្រូវ​តែ​ដាក់​វេន​ប្រចាំការ​ឲ្យ​បាន​ជាប់​ជា​ប្រចាំ សម្រាប់​ទទួល​បណ្តឹង និង​អន្តរា​គម​ន៍​បាន​ទាន់​ពេល ជូន​ពួក​គាត់​។

លោក ឃួ​ង ស្រេង បាន​មាន​ប្រសា​ស​ន៍​ទៀត​ថា ការ​ដាក់​បទបញ្ជា​នេះ ប៉ូលិស​ប៉ុស្តិ៍​រដ្ឋបាល​សង្កាត់​ទាំង​១០៥ និង​អធិការ​ខណ្ឌ​ទាំង​១២ ត្រូវ​បើក​យុទ្ធនាការ តម្រូវ​ឲ្យ​មាន​អ្នក​ប្រចាំការ ទាំង​មន្ត្រីសង្កាត់ ក៏​ដូច​ប៉ូលិស​សង្កាត់ ពិសេស​ចៅសង្កាត់​ជា​មេ​របស់​ប៉ូលិស ដែល​មាន​ភារៈកិច្ច​ត្រួតពិនិត្យ​លើ​បញ្ហា​នេះ​ត្រូវ​ត្រួតពិនិត្យ​មើល​ថា​តើ​ប៉ូលិស​ប៉ុស្តិ៍​អនុវត្ត​តាម​បទបញ្ជា​បាន​ដែរ​ឬទេ ជា​ពិសេស​ប៉ុស្តិ៍​នគរបាល និង​ចៅសង្កាត់​ត្រូវ​តែ​សហការ​គ្នា ដើម្បី​បំរើ​ប្រជាពលរដ្ឋ ដោយ​មិន​គិត​ពី​ផល​ប្រ​យោ​ជ​ន៍ជា​ធំ៕

@Amapapa.News

Feature Ads