Tuesday, August 21, 2018

សែនសុខ មិនសុខដូចឈ្មោះទេ! ក្រុមចោរសាំម៉ូរ៉ៃ​ ប្លន់អាជីវករលក់សាច់ជ្រូកម្នាក់ កាលពីយប់មិញ

អាម៉ាប៉ាប៉ាញ៉ូស

ភ្នំពេញៈ ស្រ្តីជាអាជីវករលក់សាច់ជ្រូកម្នាក់ ខណៈកំពុង​ជិះម៉ូតូទៅទិញសាច់ជ្រូក ត្រូវ​ក្រុមចោរប្រដាប់អាវុធ​ប្លន់យកម៉ូតូមួយគ្រឿងបានយ៉ាងស្រួល​។

ហេតុការណ៍នេះ កើតឡើងកាលពីវេលាម៉ោង៤ទៀបភ្លឺថ្ងៃទី២១ ខែសីហា ឆ្នាំ២០១៨ ត្រង់ចំណុចខាងកើតសាលាមុំប្រមាណ១០០ម៉ែត្រ តាមបណ្តោយផ្លូវ២០១១ ស្ថិតក្នុងសង្កាត់ក្រាំងធ្នង់ ខណ្ឌសែនសុខ។

ស្រ្តីរងគ្រោះឈ្មោះ ស៊ី​ ណាត់ អាយុ២៥ឆ្នាំ ជាអាជីវកលក់សាច់ជ្រូក ស្នាក់នៅក្នុងបូរីមហាសែនសុខ ស្ថិតក្នុងសង្កាត់ក្រាំងធ្នង់ ខណ្ឌសែនសុខ។

ស្រ្តីរងគ្រោះ បានរៀបរាប់ឲ្យដឹងថា មុនពេលកើតហេតុ គាត់​បានជិះម៉ូតូមួយគ្រឿងម៉ាក ហុងដា ស្កុបភី ពណ៌ខ្មៅ ពាក់ស្លាកលេខភ្នំពេញ1CC-5026 ដោយ​ជិះ​ចេញពីផ្ទះនៅបុរីមហាសែនសុខ គោលបំណងទៅទិញសាច់ជ្រូកនៅផ្សារដីហុយ ដើម្បីយកមកលក់ ធ្វើដំណើរតាមបណ្តោយផ្លូវ២០១១ ក្នុងទិសដៅពីលិចទៅកើត តាមដង​ផ្លូវ ស្រាប់តែលេចមុខក្រុមជនសង្ស័យ៤នាក់ ជិះម៉ូតូពីរគ្រឿង មួយគ្រឿងម៉ាកនិច មួយគ្រឿងទៀត ម៉ាកហុងដាឌ្រីម មិនចាំស្លាកលេខ ប្រដាប់ដោយដាវសាំមូរ៉ៃ ជិះដេញតាមពីក្រោយ លុះមកដល់ចំណុចកើតហេតុដែលមានភ្លើងភ្លឺៗនៅខាងមុខផ្ទះប្រជាពលរដ្ឋ ហើយដោយគាត់​ដឹងខ្លួនថា មានក្រុមជនសង្ស័យកំពុងជិះដេញតាមពីក្រោយ ពេលនោះគាត់​បានឈប់ម៉ូតូ ព្រោះគិតថា មានមនុស្សក្រែងអាចពឹងពាក់បាន តែបែរជាគ្មានមនុស្សនៅទៅវិញ រួចក្រុមជនសង្ស័យក៏បានជិះមកកាក់ម៉ូតូគាត់​ ហើយគាត់​ភ័យខ្លាំងពេក ក៏ចុះពីលើម៉ូតូ រួច​ក្រុមជនសង្ស័យឡើងជិះម៉ូតូគេចខ្លួនបាត់ស្រមោល។

ស្រ្តីរងគ្រោះបន្តថា នៅក្នុងកែបម៉ូតូរបស់គាត់ ដែលត្រូវក្រុមជនសង្ស័យប្លន់យកនោះ មានទូរសព្ទដៃចំនួន២គ្រឿង លុយ២០០ដុល្លារ។

ក្រោយពេលកើតហេតុស្ត្រីរងគ្រោះបានទាក់ទងហៅប្តីឲ្យមកដឹកទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលក្រាំងធ្នង់ ដើម្បីឲ្យសមត្ថកិច្ចជួយស្រាវជ្រាវតាមចាប់ជនសង្ស័យ និងយកម៉ូតូរបស់ខ្លួនត្រឡប់មកវិញ៕

@Amapapa.News

Feature Ads